Nëpërmjet shpërndarjes së kartave të naftës falas në bujqësi, e cila sipas ministrisë së Bujqësisë ka për qëllim uljen e kostove, fermerët përfitojnë mesatarisht 70-100 litra naftë falas për çdo hektar tokë të mbjellë, në varësi të kulturave bujqësore.
AZHBR njofton se, nga verifikimet në terren deri tani, nga skema e naftës pa taksa kanë përfituar 19’412 fermerë të cilët e kanë vendosur në përdorim për mbjelljen e 72 mijë hektarëve me kultura të ndryshme bujqësore.
Sipas AZHBR-së, interesi i fermerëve për të përfituar nga Skema Kombëtare është tejet i lartë dhe kjo falë mbështetjes financiare për këtë sektor, që ka qenë çdo vit në dispozicion të tyre dhe se sasia e naftës së përcaktuar mund të tërhiqet deri në datën 31 dhjetor 2023.
Sipas të dhënave nga Ministria e Bujqësisë dhe Zhvillimit Rural, krahasuar me vitin 2021, këtë vit numri i aplikantëve në skemën e naftës pa taksa për bujqësinë është rritur në 50 mijë nga 20 mijë aplikantë që ishin një vit më parë. Teksa është dyfishuar apo trefishuar edhe buxheti për naftën për bujqësinë dhe sipërfaqja e tokës së punuar me mekanikë bujqësore.
Sipas njoftimit për media aplikimet për përfitimin e subvencioneve direkte për bujqësinë dhe naftës falas nisën më 20 Mars dhe përfunduan më 11 prill, teksa autoritetet po vijojnë me shpejtësi procesin e verifikimit në terren dhe shpërndarjen e kartave për naftës pa taksa për fermerët.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
