Çmimet e 95% të produkteve të bulmetit nuk do të kenë rritje. Çmimet e qumështit të lopës dhe nënprodukteve të tij nuk do të rriten. Në një intervistë për emisionin Scan Update, Donjaldo Hoxha nga Shoqata e Përpunimit të Qumështit përgënjeshtroi lajmin për rritjen e çmimeve. Ai dha këtë përcaktim.
“Nuk ka asnjë njoftim nga kompanitë e përpunimit të qumështit të paktën nga ato që kemi anëtarë të Shoqatës sonë për ndryshim të çmimeve për produktet e qumështit me qumësht lope. Pra për kosin, qumështin, djathin, salcën e kosit dhe gjizën që prodhohet nga qumështi i lopës, të cilat janë produktet e përditshme që konsumojmë, nuk do të ketë asnjë ndryshim të çmimeve dhe sot këto përbëjnë rreth 92%-95% të të gjitha produketeve që prodhohen me qumësht dhe nënprodukteve të tij. Është shumë ë rëndësishmë ta theksojmë këtë,” u shpreh Donjaldo Hoxha, Shoqata e përpunuesve të qumështit.
Por nga ana tjetër, ai bën një përjashtim për produktet me bazë qumështin e bagëtive të imëta.
“Diskutohet vetëm për prodhuesit që janë me qumësht delje. Dhe unë do të flas për anëtarët e shoqatës time, që janë 8 kompanitë më të mëdha të përpunimit të qumështit në vend, vetëm 1 prej këtyre anëtarëve ka njoftuar për ndryshime të çmimeve për shkak të kostove që ka në qumështin e deles, pra po flasim vetëm për produktet që janë me qumësht delje dhe qumësht dhie,” tha Hoxha.
Prej disa ditësh në media ka qarkulluar lajmi se kompanitë e mëdha të përpunimit të qumështit duke nisur nga 15 shkurti, furnizimet e reja me gjalpë dhe djathë do të kenë një rritje të çmimeve deri në 37%.
Blerta Lata /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
