Në këtë draft-raport kërkohet edhe një herë nga BE-ja që t’i heqë masat ndëshkuese ndaj Kosovës, të cilat i ndërmori në qershor të vitit 2023, për shkak të tensioneve në veriun e vendit.
Në draft-raportin e Parlamentit Evropian për Kosovën kërkohet heqja e masave të Bashkimit Evropian të vendosura në qershor të viti 2023.
“Ftojmë për heqjen e menjëhershme të masave të BE-së ndaj Kosovës, të cilat nuk janë më të arsyeshme dhe janë në kontradiktë me përkushtimin e dëshmuar të Kosovës ndaj vlerave evropiane dhe përshtatjen me politikat e BE-së”.
Në draft gjithashtu vlerësohet përkushtimi i Kosovës për integrim në BE. Nënvizohet se e ardhmja e Kosovës është në BE dhe përpjekjet për ta nxjerrë Kosovën nga një zonë gri është në interes edhe të Kosovës edhe të BE-së.
Në këtë draft raport mbështetet aplikimi i Kosovës për anëtarësim në Bashkimit Evropian dhe ftohen vendet anëtare të cilat nuk e kanë njohur Kosovën që ta bëjnë këtë pa vonesa të reja.
Gjithashtu kërkesën e Kosovës për anëtarësim në Këshillin e Evropës dhe planin për tiu bashkuar programit të Partneritetit për paqe të NATO-s.
Në raport shprehet mbështetje edhe për procesin e dialogut për normalizimin e raporteve me Serbinë dhe përshëndetje dhe emërimi i Peter Sorensenit në postin e të dërguarit të posaçëm për dialog.
Sa i përket sundimit të ligjit c nënvizohet përparimi domethënës në fushën e drejtësisë, sigurisë dhe lirive, luftës kundër krimit të organizuar dhe funksionimit të ekonomisë së tregut. Mirëpo shprehet shqetësim për gjendjen, siç thuhet jo të kënaqshme sa i përket korrupsionit.
“Përsërisim shqetësimin për vonesat në rastet gjyqësore dhe kritikat nga ana e zyrtarëve të Qeverisë ndaj vendimeve në rastet individuale”.
Shqetësim serioz shprehet edhe për dobësitë sistematike të sistemit të drejtësisë në Kosovë, sidomos sa I përket pavarësisë dhe respektimit të ndarjeve të pushteteve. Në këtë rrafsh shprehet shqetësim i veçantë për shkak të kritikave që bëhen nga ana e zyrtarëve të qeverisë ndaj vendimeve në rastet individuale.
Në raport nënvizohet edhe shqetësimi për shkak të situatës së sigurisë. Dënohen sulmet në Bansjkë dhe Iber Lepenc dhe kërkohet që kryesit e të gjitha këtyre veprave të dhunshme të nxirren para drejtësisë. Në veçanti shprehet keqardhje pse Serbia nuk ka nxjerr para drejtësisë autorët e sulmeve në Basnjëk, përfshirë Milan Radoiçiqin.
Autor i draftit është Riho terras, raportues për Kosovën në Parlamentin evropian.
Ky dokument do prezantohet në komitetin për politikë të jashtme të parlamentit të enjten më 20 shkurt. Pas amanadamentimit të draftit, i njëjti duhet të miratohet në këtë komitet ndërsa në fillim të verës votohet në seancë planerë kur merr versionin e Rezolutës së Parlamentit evropian.
BE-ja kishte vendosur masa ndëshkuese ndaj Kosovës në qershor të vitit 2023, për shkak të veprimeve që Qeveria e Kosovës, nën drejtimin e Albin Kurtit, i kishte ndërmarrë në Veri të vendit – i banuar me shumicë serbe.
Vendimi i Unionit kishte ardhur pasi që Policia e Kosovës kishte asistuar kryetarët shqiptarë të katër komunave Veriore – Leposaviq, Zveçan, Zubin Potok dhe Mitrovicë e Veriut – për të hyrë në objektet e komunave Veriore, pas zgjedhjeve të 23 prillit 2023, ku serbët lokalë në shumicë dërrmuese kishin bojkotuar këtë proces.
Si pasojë e kësaj, serbët lokalë kishin organizuar protesta të dhunshme, madje më 26 maj kishin sulmuar ushtarët e misionit paqeruajtës të NATO-s në Kosovë, KFOR, duke lënë të lënduar dhjetëra prej tyre, kryesisht italianë dhe hungarezë.
Nga BE-ja kishin argumentuar se veprimet e Qeverisë së Kosovës kishin tensionuar situatën në Veri dhe se ekzekutivi kosovar nuk kishte përfillur kërkesat e tyre për shtensionimin e situatës në atë pjesë të vendit.
Masat e BE-së ndaj Kosovës përfshinin: suspendimin e përkohshëm të grupeve punuese për Marrëveshjen e Stabilizim-Asociimit, mosftesën e Kosovës në takime të nivelit të lartë dhe suspendimin e vizitave bilaterale.
Gjithashtu, u suspendua edhe programimi i fondeve për Kosovën, të cilat ishin paraparë të dorëzoheshin përmes Kornizës së Investimeve në Ballkanin Perëndimor dhe IPA 2024 (Instrumentet e Para-Anëtarësimit).
Postimi ” Parlamenti Europian i kërkon BE-së heqjen e masave për Kosovën ” eshte marre nga Revista Monitor.
