Pas kapërcimit të pengesave të mëdha politike pas më shumë se dy dekadash, marrëveshja gjigante tregtare tani përballet me vonesa të mëtejshme në pritje të një vendimi gjyqësor.
Parlamenti Europian votoi të mërkurën që ta referojë marrëveshjen tregtare BE–Mercosur në Gjykatën e Drejtësisë të Bashkimit Europian, një hap që e vonon ndjeshëm marrëveshjen dhe mund të rrezikojë miratimin përfundimtar.
Siç pritej, votimi ishte i ngushtë: 334 deputetë votuan pro referimit, 324 kundër dhe 11 abstenuan.
Komisioni Europian ende mund ta zbatojë përkohësisht marrëveshjen, me kusht që kjo të miratohet nga shtetet anëtare.
Marrëveshja u nënshkrua më 17 janar dhe synon të krijojë një zonë të tregtisë së lirë me mbi 700 milionë banorë. Ajo është e diskutueshme në mbarë Europën dhe disa vende, si Franca dhe Polonia, e kanë kundërshtuar me vendosmëri.
Përkrahësit e marrëveshjes e konsiderojnë atë një mundësi të madhe për industritë europiane dhe një mënyrë për të forcuar pozicionin gjeostrategjik të BE-së, veçanërisht në një kohë tensionesh të vazhdueshme me Shtetet e Bashkuara. Por ajo ka shkaktuar gjithashtu zemërim tek fermerët, të cilët shqetësohen për pasojat e futjes në tregun europian të produkteve ushqimore më të lira dhe me standarde më të ulëta nga vendet e Amerikës së Jugut.
Protesta masive u zhvilluan një ditë para votimit në Strasburg, ku mijëra fermerë, duke drejtuar traktorë, rrethuan Parlamentin Europian dhe u përplasën me policinë.
Çfarë ndodh tani
Gjykata do të shqyrtojë nëse marrëveshja tregtare është në përputhje me standarded e BE-së.
Deputetët që propozuan referimin vlerësojnë se ndarja e marrëveshjes për të lënë pjesën tregtare për miratim vetëm nga Këshilli i BE-së dhe Parlamenti Europian ishte një taktikë e Komisionit Europian për të “penguar parlamentet kombëtare të shteteve anëtare që të shprehen për marrëveshjen”, dhe kjo mund të konsiderohet e paligjshme nga gjyqtarët.
Rezoluta që kërkon sfidimin e marrëveshjes vë në pikëpyetje edhe ligjshmërinë e të ashtuquajturit “mekanizëm ribalancimi” të futur në marrëveshje, i cili do t’u lejonte vendeve të Mercosur-it të merrnin masa kompensuese nëse ligje të ardhshme të BE-së do të ulnin eksportet e tyre drejt Europës.
Referimi i miratuar të mërkurën pezullon procedurën e miratimit në Parlamentin Europian, e cila ishte planifikuar për një votim përfundimtar në muajt në vijim. Vendimi i gjykatës më të lartë të BE-së mund të marrë më shumë se një vit për t’u dhënë dhe, ndërkohë, miratimi i marrëveshjes do të mbetet i ngrirë.
Komisioni Europian ende mund të vazhdojë me zbatimin e përkohshëm të marrëveshjes ndërsa apeli i Parlamentit po shqyrtohet, pavarësisht se, ishte zotuar se do të përmbahej nga një veprim i tillë.
Kjo është teknikisht e mundur, siç e bëri të qartë një zëdhënës i Komisionit, por rrezikon të tensionojë marrëdhëniet mes institucioneve të BE-së.
Parlament i ndarë
Votimi tregoi gjithashtu se Parlamenti është i ndarë pothuajse në dy gjysma, me një diferencë prej vetëm 10 votash, dhe se disa grupe politike janë të përçara lidhur me marrëveshjen e kontestuar me vendet e Amerikës Latine.
Votimi përçau pothuajse të gjitha grupet politike të Parlamentit.
Reneë Europe, Të Gjelbrit/EFA dhe E Majta e promovuan referimin dhe në përgjithësi janë kundër marrëveshjes tregtare, megjithëse me disa përjashtime.
Grupi i ekstremit të djathtë Patriots for Europe ishte gjithashtu në favor të referimit dhe nuk hezitoi të votonte për një nismë që vinte nga krahu i majtë i Parlamentit, siç e kishte njoftuar presidenti i grupit, Jordan Bardella.
Partia Popullore Europiane dhe Socialistët & Demokratët, grupet më të mëdha të Parlamentit, e mbrojtën marrëveshjen tregtare dhe votuan kundër referimit në gjykatë. Megjithatë, në të dyja grupimet politike, disa deputetë sfiduan linjën e grupit.
Konservatorët dhe Reformistët Europianë u lejuan ligjvënësve të tyre një votë të lirë dhe u shfaq një ndarje: deputetët polakë dhe francezë votuan pro referimit, ndërsa deputetët italianë, çekë, belgë dhe baltikë votuan kundër. / Euronews
Postimi ” Parlamenti Europian ngrin marrëveshjen Mercosur, e referon atë në Gjykatën e Drejtësisë të BE-së ” eshte marre nga Revista Monitor.
