Aksionet e prodhuesve të automjeteve bien ndërsa vendet aziatike, europiane dhe të Amerikës së Veriut nxitojnë t’i përgjigjen masave të fundit të presidentit amerikan
Vendet aziatike, europiane dhe të Amerikës së Veriut, e kanë vënë në dijeni Donald Trumpin për një hakmarrje të mundshme ndaj tarifave të tij prej 25% të makinave, duke kërcënuar fillimin e një lufte të plotë tregtare globale.
Kryeministri i Japonisë Shigeru Ishiba tha se “çdo opsion” ishte në shqyrtim dhe Koreja e Jugut premtoi një përgjigje urgjente, pasi presidenti amerikan njoftoi se tarifat do të hynin në fuqi më 2 prill, kur Uashingtoni gjithashtu pritet të zbatojë një sërë tarifash reciproke kundër partnerëve tregtarë të Amerikës.
Tarifat e makinave janë masa më agresive e politikave tregtare të Trump deri më tani dhe godasin aksionet në prodhuesit e makinave nga Toyota, Stellantis deri te Porsche. Indeksi i Stoxx Europe 600 Automobiles & Parts ra 3% në fillim të tregtimit të së enjtes.
Drejtuesit e industrisë paralajmëruan se prodhuesit aziatikë dhe europianë të makinave do të jenë ndër më të goditurit. Prodhuesit e makinave luksoze, si Jaguar Land Rover dhe Aston Martin, janë gjithashtu të ekspozuar, pasi nuk prodhojnë makina në SHBA.
Me 40 miliardë dollarë shitje makinash në SHBA në vitin 2024, Japonia është eksportuesi më i madh i automjeteve në vend pas Meksikës, ku kompanitë japoneze janë prodhuesit dominues.
Ndërsa vendet anembanë botës përgatiten për një afat më pak se një javë larg, Ursula von der Leyen, presidente e Komisionit Europian, tha se blloku planifikoi “të ruajë interesat e tij ekonomike”, ndërsa kërkon një zgjidhje të negociuar për mosmarrëveshjen.
Ministri francez i financave Eric Lombard sulmoi SHBA-në për “ndryshimin e plotë të politikës ekonomike në një mënyrë shumë agresive”, duke dëmtuar ekonomitë e të dy rajoneve.
Në të kundërt, kancelarja e Mbretërisë së Bashkuar Rachel Reeves sinjalizoi se qeveria britanike nuk kishte plane për t’u hakmarrë, duke thënë se nuk ishte në një “pozitë ku nuk duam të bëjmë asgjë për të përshkallëzuar këto luftëra tregtare”.
Megjithatë, Trump nuk dha asnjë shenjë tërheqjeje.
“Nëse Bashkimi Europian punon me Kanadanë në mënyrë që t’i bëjë dëm ekonomik SHBA-së, tarifa në shkallë të gjerë, shumë më të mëdha se sa është planifikuar aktualisht, do të vendosen për të dyja,” postoi ai në rrjetin e tij “Truth Social”.
“PËR VITE NE JEMI SHKELQUR NGA CDO VEND NË BOTË, SI MIK DHE ARMIK. POR ATO DITË KANË MBARUAR – AMERIKA E PARA!!!”
Aksionet në Stellantis, pronari i markave Fiat, Peugeot dhe Chrysler, ranë 4%, Porsche ra 3% dhe Volksëagen ra 2%.
Prodhuesit europianë të pjesëve të makinave u goditën gjithashtu, me Valeo të Francës duke rënë 5% dhe Continental të Gjermanisë 2.8% më poshtë. General Motors dhe Ford gjithashtu ranë në tregtimin para hapjes së tregut në Nju Jork.
Vendimi i Shtëpisë së Bardhë për të vendosur detyrime për pjesët e importuara të makinave, si dhe automjetet e përfunduara, do të shkaktonte dëme të mëtejshme, thanë analistët. Pothuajse gjysma e automjeteve të shitura në SHBA janë të importuara dhe makinat e montuara në SHBA përmbajnë gati 60% pjesë me burime të huaja, sipas Bernstein.
Trump ka thënë se tarifat e larta do të bindin kompanitë e huaja, që të prodhojnë më shumë nga makinat e tyre në SHBA, duke nxitur industrinë e prodhimit të vendit.
Sigrid de Vries, drejtoresha e përgjithshme e organizmit europian të industrisë së makinave Acea, i kërkoi Trumpit të “konsiderojë ndikimin negativ të tarifave jo vetëm në prodhuesit globalë të automjeteve, por edhe në prodhimin vendas të SHBA”.
Prodhuesit europianë eksportojnë deri në 60% të automjeteve që prodhojnë në SHBA, sipas Acea. / FT
Postimi ” Partnerët tregtarë të SHBA paralajmërojnë për hakmarrje ndaj tarifave 25% të makinave të Trump ” eshte marre nga Revista Monitor.
