Minatorët kërkojnë që shtesa 1 për qind të aplikohet në momentin e daljes në pension dhe jo kur të mbushin moshën për pension pleqërie sikundër edhe përcaktohet në statusin e miratuar disa vite më parë.
Konkretisht, minatorët dalin në pension në moshën 55 vjeç, por e drejta për të marrë 1 për qind shtesë në vit mbi masën e përfitimit nuk aplikohet menjëherë, por kur mbushin moshën e daljes në pension pleqërie, pra në moshën 65 vjeç, që është edhe mosha e daljes në pension për burrat. Kjo u vu në dukje edhe nga kreu i Konfederatës së Sindikatave, Kol Nikollaj.
Nga studio e emisionit “Box to Box” Nikollaj ngriti si shqetësim edhe mosderdhjen e kontributeve për skemën suplementare.
Ndryshimet ligjore të miratuara në 2019-n përcaktojnë që ata minatorë të cilët janë aktualisht në marrëdhënie punë, të paguajnë 5 për qind kontribute shtesë, një pjesë prej të cilave e mbulon punëdhënësi dhe pjesa tjetër paguhet nga vetë minatorët. Përmes kësaj nisme synohej që të rritej masa e përfitimit për minatorët.
Veç kësaj, derdhja e këtyre kontributeve do të ulte gradualisht edhe ngarkesën e buxhetit të shtetit. Por edhe pse kanë kaluar gati 4 vite nga miratimi i këtyre ndryshimeve, rezulton që ato nuk kanë gjetur zbatim. Kujtojmë që për të dalë në pension pleqërie duhet të plotësohen dy kushte, së pari mosha 55 vjeç dhe së dy dyti duhet që minatorët të kenë mbi 30 vite pune, nga të cilat jo më pak se 12 vjet e 6 muaj në miniera.
Ada Hazizolli/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
