Lidion Kulla/
Tregu i pensioneve private në Shqipëri ka vijuar zgjerimin e qëndrueshëm edhe gjatë tremujorit të dytë të këtij viti. Megjithatë numri i anëtarëve vijon të jetë ende shumë i ulët, krahasuar me totalin e kontribuesve në skemën e sigurimeve shoqërore.
Sipas të dhënave të publikuara nga Autoriteti i Mbikëqyrjes Financiare, numri i anëtarëve në fondet e pensioneve, deri në fund të qershorit të këtij viti ishte 41,344 anëtarë, duke shënuar një rritje prej 8.29%, krahasuar me fundit e vitit 2023. Ndërkohë, sipas të dhënave të Institutit të Sigurimeve Shoqërore (ISSH), për vitin 2023 ishin rreth 783 mijë kontribues në skemën e sigurimeve shoqërore.
Në anën tjetër, këto shifra tregojnë edhe potencialin e madh që ka tregu i pensioneve private në vendin tonë, sepse numri i individëve që kontribuojnë në një pension privat është rreth 5.2% e numrit të përgjithshëm të kontribuesve në skemën e sigurimeve shoqërore.
Ndërkohë, vlera totale e aseteve neto në pensionet private arriti në 7.29 miliardë lekë ose në rreth 72.6 milionë euro, me një rritje prej 552 milionë lekë apo me 8.2%, krahasuar me fundit e vitit 2023. Për 6-mujorin e këtij viti, në tregun e pensioneve private ushtruan aktivitetin e tyre gjashtë fonde pensioni, ndërsa asetet investohen 100% në bono thesari dhe obligacione të qeverisë shqiptare.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
