Intervistë me Algert Luzin, Administrator i FSHU
Furnizuesi i Shërbimit Universal (FSHU), pjesë e OSHEE Group, ka nisur procesin e përditësimit të kontratave të energjisë elektrike.
Përmes një njoftimi të mëhershëm, FSHU bëri të ditur se ka ngritur grupe kontrolli në terren, të cilat kanë konstatuar subjekte private që ushtronin aktivitet biznesi, kryesisht në sektorin e shërbimeve, por që vijonin të tarifoheshin si klientë familjarë me 8.5–9.5 lekë/kWh, në vend të tarifës 14 lekë/kWh të miratuar për klientët biznes.
Në një intervistë për “Monitor”, administratori i Furnizuesit të Shërbimit Universal, Algert Luzi, sqaron këtë proces hap pas hapi.
Ai thekson se shkas janë bërë raste të subjekteve private që ushtrojnë aktivitet në kate të sipërme të ndërtesave shumëkatëshe, por edhe në njësi private që nuk kanë përditësuar të dhënat, duke vijuar të figurojnë si klientë familjarë, ndonëse realisht funksionojnë si biznese.
Z. Luzi ndalet gjithashtu te situata e profesionistëve të lirë që punojnë nga shtëpia, ku adresa e banesës përdoret për efekt regjistrimi të NIPT-it, duke theksuar mënyrën se si trajtohen këto raste në kuadër të procesit të verifikimit dhe tarifimit.
Verifikimi
Në çdo rast, theksojmë se profesionistët e lirë ose ata që punojnë nga shtëpia nuk preken nga ky proces verifikimi. Nëse aktiviteti ushtrohet nga banesa, kontrata mbetet familjare.
FSHU ka njoftuar për grupe në terren që po verifikojnë kontratat e energjisë, me fokus bizneset, me qëllim tarifimin e drejtë. Cila është procedura që po ndiqet?
Sipas një plani pune të miratuar paraprakisht, grupi i kontrollit del në terren dhe kryen verifikimin e kontratave. Për ta bërë më të kuptueshme, baza e këtij plani është kontrolli i kontratave sipas kabinës. Pra, verifikohen kontratat familjare që faturohen me 8.5–9.5 lekë/kWh dhe kontratat e biznesit që faturohen me 14 lekë/kWh.
Fillimisht, ne u referohemi vetëm të dhënave që kemi në sistemin tonë. Objekti i këtij verifikimi janë ambientet që ndodhen në katet e sipërme të ndërtesave shumëkatëshe dhe kudo, të cilat ushtrojnë aktivitet ekonomik, por kontrata e energjisë nuk është rifreskuar dhe vijon të faturohet si familjare.
Në shumë raste, këto subjekte nuk janë të informuara se si faturohen dhe nuk kanë rifreskuar të dhënat si përdorues, pasi nuk kanë qenë në dijeni të këtij detyrimi.
Pikërisht kjo është edhe detyra e grupit të verifikimit: kur konstatohet një ambient që faturohet si familjar, por në fakt ushtron aktivitet ekonomik, për shembull një klinikë dentare, subjekti njoftohet që duhet të lidhë kontratë të re sipas kategorisë përkatëse.
Ky është një proces që kërkon kohën e vet. Pasi grupi hyn në një pallat verifikon një nga një katet, duke u bazuar në të dhënat e afishuara në hyrje, tabelat e bizneseve apo indicie të tjera konkrete. Në këto raste, grupi troket dhe kërkon verifikimin e kontratës.
Nëse rezulton se subjekti është familjar ose biznes me kontratë të rregullt, nuk ka asnjë ndryshim. Nëse konstatohet se është biznes, por nuk ka bërë rifreskimin për t’u faturuar si i tillë, i lihet një afat për të kryer këtë procedurë. Verifikimi shënohet në tabletin e punës së grupit, si i përfunduar.
Për rastet kur konstatohet që kemi të bëjmë me një biznes në katet e sipërme, çfarë ndodh konkretisht?
Kur grupi konstaton që në ambient ushtrohet aktivitet biznesi, kërkon të dhënat e kontratës dhe kryen verifikimin. Nëse kontrata është e tarifuar me 14 lekë/kWh, siç parashikohet, bëhet shënimi përkatës që është në rregull. Nëse jo, lihet një njoftim.
Verifikimi bazohet në sistemin tonë, i cili ka dy elemente: titullarin e kontratës dhe përdoruesin. Kontrollohet nëse personi që ushtron aktivitetin është titullari i kontratës apo një qiramarrës, çka nënkupton nevojën për vendosjen e përdoruesit.
Lihet një njoftim ku specifikohet se brenda 7 ditëve, nëse subjekti është përdorues i ambientit, duhet të paraqitet pranë Qendrave të Kujdesit ndaj Klientit të FSHU për të bërë aplikimin për vendosje përdoruesi.
Kjo shërben fillimisht për përditësimin e të dhënave dhe më pas për kërkesën e tarifimit sipas kategorisë përkatëse. Njoftimi i dorëzohet subjektit dhe pritet përmbyllja e procesit brenda afatit standard prej 7 ditësh. Pas këtij afati, verifikohet në sistem nëse procedura është ndjekur apo jo.
Si trajtohen rastet e profesionistëve të lirë që e kanë deklaruar adresën e banimit në QKB, por nuk e ushtrojnë aktivitetin aty, apo rishitësit online pa magazinë apo dyqan?
Ne nuk kryqëzojmë të dhënat me QKB apo Tatimet. Verifikimi që po kryejmë është në terren, për të konstatuar vetëm ato ambiente që kanë elemente të qartë biznesi dhe ushtrojnë aktivitet ekonomik.
Përdorimi i të dhënave shtesë bëhet vetëm në raste shumë specifike, kur na nevojitet të plotësojmë informacionin e konstatuar.
Në çdo rast, theksojmë se profesionistët e lirë ose ata që punojnë nga shtëpia nuk preken nga ky proces verifikimi. Nëse aktiviteti ushtrohet nga banesa, kontrata mbetet familjare. Nëse banesa është kthyer tërësisht në zyrë dhe nuk shërben më për banim, atëherë kontrata ndryshon dhe kalon në biznes.
Është parashikuar edhe rasti i gabimeve, ku një familjar mund të klasifikohet gabimisht si biznes. Në këto raste, abonenti ka të drejtë të paraqitet, të bëjë deklaratë dhe ankimim, të cilat reflektohen menjëherë pas verifikimit.
Për shembull, një abonent mund të deklarojë se është graphic designer dhe për shkak të NIPT-it ka deklaruar adresën e shtëpisë, gjë që e përjashton automatikisht nga ndryshimi i tarifimit. Por nëse ka një ambient që shërben vetëm si zyrë, atëherë kontrata kalon në biznes.
Sa pritet të zgjasë ky proces?
Procesi nuk ka një afat të përcaktuar. Synimi është të realizohet një verifikim i plotë në të gjithë territorin e vendit. Procesi ka nisur nga Tirana dhe gradualisht do të shtrihet në të gjithë Shqipërinë.
Cilat janë të dhënat paraprake që ka konstatuar grupi i punës?
Ky proces nuk ka nisur rastësisht. Ne kemi pasur një bazë fillestare të dhënash. Nga verifikimet rezulton se në katet e sipërme të ndërtesave shumëkatëshe ka subjekte që kanë marrë ambiente me qira, fillimisht të destinuara për banim dhe ushtrojnë aktivitet ekonomik duke u faturuar ende si familjarë.
Cila është procedura që duhet të ndjekë një person për të bërë verifikimin ose përditësimin e kontratës?
Çdo person që ka një ambient ku ushtron aktivitet biznesi, qoftë në pronësi apo me qira, duhet të paraqitet pranë Qendrave të Kujdesit ndaj Klientit dhe të bëjë kërkesë për përditësimin e të dhënave dhe kategorizimin e saktë të konsumit, familjar ose biznes, sipas rastit.
Në rastet e qirasë, duhet të bëhet edhe deklarimi i përdoruesit, pasi është në interes të biznesit që fatura të fiskalizohet në emrin e tij dhe jo të titullarit familjar të kontratës. Kjo faturë njihet më pas si shpenzim i zbritshëm.
Vendosja e përdoruesit dhe kërkesa për tarifim të drejtë kërkojnë pak kohë. Dokumentacioni përfshin vetëm NIPT-in dhe kontratën e ambientit dhe procesi përmbyllet brenda 1–2 ditësh.
Çfarë ndodh nëse pas afatit 7-ditor, subjekti nuk kryen përditësimin?
Nëse pas verifikimit dhe kalimit të afatit 7-ditor subjekti nuk ka ndërmarrë asnjë veprim, atëherë ne, bazuar në të dhënat e sistemit, e kalojmë automatikisht kontratën në grupin përkatës të faturimit. Nëse është biznes, do të faturohet me tarifën 14 lekë/kWh.
Procedura ndiqet sipas standardeve: nëse njoftimi nuk merret personalisht, subjekti njoftohet edhe me postë. Vetëm pasi është ezauruar e gjithë kjo procedurë, kryhet ndryshimi i tarifimit.
Postimi ” “Përditësimi i kontratave të energjisë, çfarë përfshin procesi dhe kush preket” ” eshte marre nga Revista Monitor.
