Perspektiva e ekonomisë globale mbetet e paqartë dhe e rrezikuar nga inflacioni i lartë. Bankat qendrore në të gjithë botën po rrisin sërish interesat.
Këtë javë, Rezervat Federale në Shtetet e Bashkuara të Amerikës rritën në 5.25% normën bazë të interesit për dollarin, niveli më i lartë në 16 vite. Ndërsa Banka Qendrore Europiane e rriti në 3.25% normën bazë të interesit për euron, rritja e shtatë që prej marsit të vitit të kaluar.
Një politikë monetare shtrënguese ka ndjekur edhe Banka e Shqipërisë, megjithëse në mbledhjen e fundit të Këshillit Mbikëqyrës, të zhvilluar të mërkurën, nuk pati rritje të mëtejshme të normës bazë të interesit për lekun, që mbeti në 3%.
Rritja e interesave po bëhet në përpjekje për të mbajtur nën kontroll inflacionin, që edhe këtë vit rrezikon ekonomike globale.
Në Shtetet e Bashkuara inflacioni ka shënuar në mars 5%, duke qenë larg objektivit prej 2% për këtë tregues. Në Europë, inflacioni shënoi në prill 7%, duke pësuar rritje kundrejt marsit dhe duke ngjallur alarmin e rritjes së çmimeve.
Ndërsa në Shqipëri, edhe pse në mars inflacioni pësoi një rënie deri në 5.3%. Por situata mbetet e paqartë dhe larg objektivit prej 2% për këtë tregues.
E në varësi të inflacionit dhe pasojave të rritjes së normave bazë të interesit do të jetë edhe ecuria e ekonomisë.
Gjatë vitit 2022, ekonomia jonë u rrit me 4.8%, ndër nivelet më të lartat në rajon. Ndërkohë që do të ngadalësohet këtë vit dhe sipas Bankës Botërore, rritja pritet të arrijë në 2023-in në vetëm 2.8%.
Por cilët janë faktorët që do të ndikojë në ngadalësimin e ekonomisë?
Kemi evidentuar: luftën në Ukrainë; pasigurinë e tregjeve ndërkombëtare; krizën e çmimeve; rritja e vazhdueshme të interesave dhe tkurrjen e fuqisë punëtore.
Burimi: A2 CNN
