6.5 C
Tirana
E premte, 23 Shkurt 2024

Punonjësit kategorizohen në 6 tipe, sipas studimeve të fundit. Cili tip jeni ju?

Siҫ thotë dhe shprehja e famshme, “Zgjidhni një punë që ju pëlqen dhe nuk do t’ju duhet të punoni asnjë ditë në jetën tuaj.”

Duhen Lexuar

Realiteti për shumë njerëz është se ata ndihen sikur u janë dhënë disa role ku nuk mund të shfaqin më së miri aftësitë apo interesat e tyre.

Kompania e konsulencës së menaxhimit Bain & Company ka identifikuar gjashtë profile punonjësish, të cilat mund të ndihmojnë bizneset dhe punonjësit që të kuptojnë më mirë motivacionet e ndryshme dhe pozicionet më të përshtatshme për këto lloje personalitetesh.

Studimi, i cili bazohet te rezultatet e një ankete me 20,000 punonjës, mund të ndihmojë kompanitë që po përballen me një valë të largimeve nga puna dhe me vështirësitë e rekrutimeve të reja si rrjedhojë e fenomenit të Dorëheqjes së Madhe, të shkaktuar nga pandemia.

Nuk ekziston “punonjësi mesatar”

Koncepti për atë që konsiderohet një “punë e mirë” po ndryshon, sipas kompanisë Bain, prandaj koncepti i “punonjësit mesatar” nuk ka më vlerë. Në vend të kësaj, ajo ka identifikuar gjashtë lloje kryesore të punonjësve: operatorët, ofruesit, artizanët, eksploruesit, nismëtarët dhe ambiciozët.

Operatorët e konsiderojnë punën thjesht si diҫka që duhet bërë dhe nuk kanë ndonjë fokus specifik te statusi ose autonomia. Ata preferojnë stabilitetin dhe parashikueshmërinë, si dhe janë një nga llojet e punonjësve më të orientuar drejt punës në ekip.

Ofruesit e gjejnë kuptimin te punët që përmirësojnë drejtpërdrejt jetën e të tjerëve dhe shpesh orientohen drejt profesioneve si mësimdhënia apo mjekësia. Ata janë shumë të prirur për punën në ekip, por kanë një natyrë të kujdesshme dhe preferojnë t’i planifikojnë gjërat.

Artizanët pëlqejnë punët që i frymëzojnë dhe motivohen nga arritja e mjeshtërisë në profesionin e tyre. Ata zakonisht kërkojnë një shkallë të lartë autonomie dhe nuk i kushtojnë shumë vlerë marrëdhënieve të punës.

Eksploruesit vlerësojnë lirinë dhe eksperiencat e reja. Ata ndjekin karriera që ofrojnë aktivitete të shumëllojshme, plot emocione. Zakonisht, këta punonjës nuk presin të gjejnë identitetin e tyre nga puna që bëjnë dhe do t’i qasen zhvillimit profesional me mendësinë për të arritur nivelin që u nevojitet për të pasur sukses.

Nismëtarët duan të ndryshojnë gjërat – ata kanë pikëpamje të forta për mënyrën se si duhet bërë një punë dhe duan të kenë kontrollin që nevojitet për të bërë këto ndryshime. Këta punonjës janë tolerantë ndaj riskut dhe identifikohen shumë me punën e tyre, duke bërë sakrifica të mëdha personale për të përmbushur vizionin që kanë.

Ambiciozët duan të bëhen dikushi në jetë dhe motivohen nga statusi dhe kompensimi. Këta punonjës zakonisht bëjnë plane dhe zgjedhin rrugët e sigurta drejt suksesit. Ata mund të jenë më konkurrues dhe më transaksional në marrëdhëniet e tyre me kolegët, krahasuar me llojet e tjera të punonjësve.

Siç tregon grafiku i mëposhtëm, disa kategori punësh preferohen më shumë nga llojet e ndryshme të punonjësve se sa të tjerat.

Studiuesit vunë re disa diferenca në lidhje me qëndrimet ndaj punës ndërmjet shteteve të ndryshme. Disa shtete kishin më shumë punonjës të disa kategorive të caktuara se sa shtetet e tjera.

Megjithatë, mosha dhe statusi socio-ekonomik kanë një ndikim të theksuar. Punonjësit më të arsimuar dhe me të ardhura më të larta i kushtojnë më shumë rëndësi autonomisë, statusit dhe të ardhmes. Kjo përkthehet në një përqindje më të lartë të nismëtarëve dhe të ambiciozëve, por në një përqindje më të ulët të operatorëve.

Ambienti i punës po ndryshon

Pandemia ka detyruar shumë prej nesh që të rimendojmë rolin që duhet të ketë puna në jetën tonë, pasi gjithmonë e më shumë njerëz po kërkojnë një ekuilibër më të mirë punë-jetë. Krahas tendencave më të mëdha në ambientin e punës, si automatizimi dhe teknologjitë dixhitale, puna fleksibël dhe dëshira e kompanive për të pasur një mision social, ambienti tradicional i punës po ndryshon.

Sipas studimit të Bain, 58% e punonjësve në 10 ekonomi kryesore të botës po rishikojnë balancën e tyre punë-jetë, si rrjedhojë e pandemisë.

Ndërmjet periudhës shkurt 2020 dhe shkurt 2021, më shumë se një e katërta e punonjësve në Amerikë ndryshuan punëdhënës. Megjithëse një pjesë e madhe e kësaj shifre mund të jetë rrjedhojë e largimeve të pavullnetshme nga puna, është e qartë se një numër i madh punonjësish po rivlerësojnë rolin që ka puna në jetën e tyre.

- Reklama -
spot_img
- Reklama -

Artikujt e Fundit