Kompania globale ECA International ka publikuar listën e saj vjetore të qyteteve më të shtrenjta në botë për të jetuar dhe, përsëri, Hong Kongu është në krye të listës.
Kompania e përgatit këtë listë bazuar te disa faktorë, duke përfshirë çmimin mesatar të ushqimeve për konsumatorët familjarë si qumështi dhe vaji i gatimit, të qirasë, të faturave të energjisë, të transportit publik dhe të fuqisë së monedhës vendase.
Ky është viti i tretë radhazi që Hong Kongu mban vendin e parë, duke u listuar si qyteti më i shtrenjtë në botë në indeksin ECA. Ky indeks fokusohet veçanërisht te punonjësit e huaj për të bërë renditjen.
Azia kryeson listën
Azia mund të konsiderohet kontinenti më i shtrenjtë, pasi pesë qytete të saj – Hong Kong, Tokio, Shangai, Guangzhou dhe Seul – janë pjesë e listës së 10 qyteteve më të shtrenjta në botë.
Disa organizata e përfshijnë edhe Lindjen e Mesme në Azi. Në këtë rast, edhe Tel Avivi, i cili është renditur në vendin e gjashtë, do të llogaritej si qytet i Azisë, duke e bërë këtë kontinent që të zërë gjashtë vende në listën e 10 qyteteve më të shtrenjta.
Në Azi ndodhet gjithashtu edhe qyteti me rritjen më të shpejtë në listën e përgjithshme. Ky qytet është Colombo, metropoli kryesor i Sri Lankës, i cili u ngjit në renditje me 23 vende, nga vendi i 162-të në venin e 149-të.
Lee Quane, drejtori rajonal i ECA për Azinë, shpjegoi arsyet për rritjen e pranisë së Kinës kontinentale në këtë indeks.
“Shumica e qyteteve kontinentale të Kinës në renditjen tonë kanë norma më të larta inflacioni nga sa jemi mësuar që të shohim, por megjithatë ato mbeten më të ulëta se në vendet e tjera të Azisë,” tha Quane në një deklaratë. “Prandaj, arsyeja kryesore për rritjen e tyre në këtë renditje ka qenë fuqizimi i vazhdueshëm i juanit kinez kundrejt monedhave të tjera kryesore.”
Qytetet që kanë rënë në renditje
Pra, cilat qytete janë renditur më poshtë krahasuar me vitet e mëparshme?
Parisi, i cili ka kryesuar listën e ECA në të kaluarën, nuk është më pjesë e 30 vendeve të para. Madridi, Roma dhe Brukseli pësuan gjithashtu rënie në renditje.
“Pothuajse çdo qytet i madh i Eurozonës pati një rënie në renditje këtë vit, pasi euro performoi më keq në 12 muajt e fundit krahasuar me dollarin amerikan dhe paundin britanik,” shpjegon Quane.
Faktorët e jashtëm, si politika dhe konfliktet ndërkombëtare, mund të luajnë gjithashtu një rol të rëndësishëm në këtë renditje. Pushtimi i Ukrainës nga Rusia dhe sanksionet që erdhën si pasojë e luftës, të vendosura nga shumë vende, shpjegojnë arsyen pse Moska u rendit në vendin e 62-të dhe Shën Petersburgu ra në vendin e 147-të.
Qyteti më i shtrenjtë në Europë është Gjeneva e Zvicrës, e cila u rendit në vendin e tretë pas Hong Kongut dhe Nju Jorkut. Zvicra përdor frangën zvicerane në vend të euros.
Pandemia e koronavirusit padyshim që ka luajtur një rol të rëndësishëm në zinxhirët e furnizimit global dhe në faktorë të tjerë ekonomikë.
Renditjet e tjera
ECA International nuk është e vetmja kompani që rendit qytetet e botës bazuar te të dhënat ekonomike.
Njësia e Inteligjencës Ekonomike (EIU) me qendër në Londër publikon indeksin e saj të Kostove Botërore të Jetesës çdo dhjetor. Në vitin 2021, Tel Avivi zuri vendin e parë si qyteti më i kushtueshëm për të jetuar, i ndjekur nga Parisi dhe Singapori që u renditën në vendin e dytë.
Hong Kongu ishte në vendin e pestë, pas Zyrihut.
Të dyja këto indekse përdorin çmimet e artikujve të përditshëm, si produktet ushqimore dhe karburantin, për të përcaktuar renditjen e qyteteve. Megjithatë, EIU i lidh shifrat e saj me dollarin amerikan, kështu që ekonomitë që bëjnë të njëjtën gjë – si për shembull, Hong Kongu – kanë më shumë gjasa që të renditen më lart.
Sido që të jetë, pavarësisht renditjes së qyteteve në indekse të ndryshme, është e qartë se qytetet aziatike, europiane dhe ato të Amerikës së Veriut janë shumë më të shtrenjta për të jetuar sesa qytetet e Afrikës dhe të Amerikës së Jugut.
Qytetet më të shtrenjta në botë
- Hong Kongu
- Nju Jorku
- Gjeneva
- Londra
- Tokio
- Tel Avivi
- Zyrihu
- Shangai
- Guangzhou
- Seuli.
