Impiante të ndryshme makinash në Europë dhe në Amerikën e Veriut rrezikojnë të mbyllen ose të shiten këtë vit, pasi markat e makinave po luftojnë me mbikapacitetin dhe konkurrencën e çmimeve – tha shoqëria e kërkimeve Gartner në një raport.
Shtëpitë automobilistike ka të ngjarë të reduktojnë kapacitetin prodhues në të dy kontinentet në vitin 2025, për shkak të objektivave të emetimeve dhe të tarifave, ndërkohë që dominimi i makinave elektrike të Kinës (EV) do të rritet, falë avantazhit të saj në softuerë dhe elektrifikim, tha shoqëria.
Mbylljet apo shitjet kanë më shumë të ngjarë të ndodhin në vendet me kosto të larta, ku presioni politik dhe social do të kompensohet nga rritja e konkurrencës, – deklaroi për Reuters, Pedro Pacheco, analist në Gartner.
“Është si një tenxhere me presion – tha Pacheco. – Presioni rritet, rritet… dhe kjo do t’i shtyjë disa shtëpi automobilistike të marrin vendime më pragmatike”.
Markat kineze mund të blejnë impiante për të kapërcyer barrierat tregtare apo të hapin fabrika të reja në vende europiane me kosto të ulët dhe në partnerë të tregtisë së lirë, si Maroku apo Turqia, parashikoi shoqëria.
Duke iu frikësuar ndërprerjeve për shkak të normave të emetimeve të CO2 nga Bashkimi Europian në vitin 2025, CEO i furnizuesit gjerman të makinave Bosch, Stefan Hartung, deklaroi të mërkurën për revistën “Auto Motor und Sport” se Blloku duhet të përmbahet ndaj sanksioneve të kompanive që nuk arrijnë objektivat.
Industria europiane e automobilave nuk është më në rrugën e duhur për të arritur objektivat e saj për vitin 2030 dhe 2035 në lidhje me makinat elektrike, tha Luc Chatel, kryetar i lobit francez të makinave PFA.
“Rreziku është që ne të reduktojmë shitjet e makinave me motor me djegie të brendshme për të rritur artificialisht shitjet e makinave elektrike” – tha ai për Reuters.
Pavarësisht sfidave të elektrifikimit, Gartner parashikon që shitjet e autobusëve, makinave, furgonëve dhe kamionëve elektrikë do të rriten në total me 17% në vitin 2025. Shoqëria parashikon, ndër të tjera, se më shumë se 50% e të gjithë modeleve të makinave të tregtuara nga shtëpitë automobilistike do të jenë makina elektrike brenda vitit 2030
Për të realizuar këtë kalim, shtëpitë automobilistike tradicionale mund të blejnë softuerë nga prodhues më të rinj të makinave elektrike dhe kompani dixhitale, të fuqizojnë qendrat e kërkimit dhe zhvillimit në qendrat e teknologjisë apo të bashkëpunojnë me kompani teknologjike për të krijuar sipërmarrje të përbashkëta të vetëfinancuara mbi makinat elektrike – deklaroi Pacheco.
/ Reuters
Postimi ” Raporti / Fabrikat e makinave në Europë dhe në Amerikën e Veriut rrezikojnë të mbyllen në vitin 2025 ” eshte marre nga Revista Monitor.
