Britania do të rrisë pagën minimale për punëtorët e moshës 21 vjeç e sipër me 4.1%, në përpjekje për të ndihmuar punonjësit me të ardhura të ulëta. Ekspertët kanë paralajmëruar se kjo masë do të dëmtojë bizneset e vogla dhe do të nxisë inflacionin.
Kancelarja e Thesarit, Rachel Reeves, njoftoi planet për të rritur pagën minimale për punëtorët më të rinj në 12.71 paund (17 dollarw) në orë, një ditë para prezantimit të buxhetit të shumëpritur. Reeves tha se kjo masë, e cila do të hyjë në fuqi në prill, do të mbështesë njerëzit që “me vështirësi arrijnë të përballojnë shpenzimet”.
Masa ishte një nga disa të pritshme në buxhet për të adresuar shqetësimet për koston e jetesës. Kancelarja ka ngrirë tashmë tarifat hekurudhore dhe pritet të zbulojë masa të tjera për uljen e kostove të familjeve, përfshirë reduktime të faturave të energjisë, si pjesë e një pakete buxhetore të dizajnuar për të riformatuar marrëdhëniet e Partisë Laburiste në pushtet me elektoratin dhe për të qetësuar tregjet.
Rritja e fundit e “Pagës Kombëtare të Jetës” për punëtorët 21 vjeç e sipër vlen 900 paund në vit dhe përfaqëson një rritje 22% gjatë katër viteve të fundit. Punëtorët e moshës 18-20 vjeç do të marrin një rritje edhe më të madhe në prill, me vlerë 1,500 paund në vit, ndërsa paga e tyre minimale rritet me 8.5% në 10.85 paund në orë. Ritmi më i shpejtë pasqyron planet e qeverisë për të eliminuar gradualisht këtë kategori dhe për të kaluar në një nivel të vetëm për të gjithë të rriturit.
Rritjet, në përputhje me rekomandimet e Komisionit të Pagës së Ulët, do të sigurojnë “që ata me të ardhura të ulëta të shpërblehen siç duhet për punën e tyre të vështirë,” tha Reeves. Britania ka një nga nivelet më të larta të pagës minimale në Europë, mbi Francën, pasi niveli është i fiksuar në dy të tretat e pagës mesatare.
Megjithatë, grupet e biznesit dhe ekonomistët paralajmëruan se rritja e fundit mund të dëmtojë punësimin, veçanërisht tek të rinjtë. Inflacioni i çmimeve të konsumit u ngadalësua në 3.6% muajin e kaluar dhe Banka e Anglisë projeksionon një rënie të mëtejshme në 2.9% deri në tremujorin e dytë të vitit të ardhshëm.
Të dhënat e Zyrës së Statistikave Kombëtare tregojnë se 12.7% e të rinjve 18-24 vjeç janë të papunë, krahasuar me normën e përgjithshme prej 5%. Reeves në shtator u zotua për eliminimin e papunësisë afatgjatë të të rinjve.
Rritja e pagës tregon se disa nga objektivat e politikave që Reeves pritet të paraqesë në buxhet, përfshirë nxitjen e rritjes ekonomike dhe kontrollin e inflacionit, janë në tension me njëra-tjetrën. Një rritje e ngjashme vitin e kaluar ishte ndër disa masa, përfshirë rritjen me 26 miliardë paund të Kontributeve të Sigurimeve Kombëtare për punëdhënësit, të cilat u fajësuan për rritjen e çmimeve.
Një vlerësim i qeverisë për ndikimin e rritjes 6.7% të vitit të kaluar në “Pagën Kombëtare të Jetës” në 12.21 paund në orë tregoi se bizneset e vogla do të pësonin goditjen më të madhe. Analiza zbuloi se 22% e stafit në “mikro biznese” paguhen me pagë minimale, krahasuar me 15% në bizneset e vogla, 10% në bizneset e mesme dhe 8% në ndërmarrjet e mëdha.
“Ndërmarrjet e vogla dhe të mesme do të mbajnë 56% të rritjes së kostos monetare të punës dhe, për këtë arsye, do të preken në mënyrë disproporcionale në raport me pjesën e tyre në punësim,” thuhej në studim.
Shkalla e pagës minimale për 16 dhe 17-vjeçarët do të rritet gjithashtu me 6% në 8 paund në orë duke filluar nga prilli. BOE tha më herët këtë muaj se “Paga Kombëtare e Jetës” ka rritur rritjen e përgjithshme të pagave me rreth 0.2 pikë përqindje.
“Me Kontributet e Sigurimeve Kombëtare që rriten, kostot e punësimit që ngjiten dhe punësimi që bëhet më i rrezikshëm, punëdhënësit e vegjël po mendojnë dy herë para se të marrin punonjës, dhe janë të rinjtë ata që do të mbeten jashtë,” tha Tina McKenzie, kryetare e politikave në Federatën e Bizneseve të Vogla.
Rob Wood, kryeekonomist i Mbretërisë së Bashkuar në Pantheon Macroeconomics, tha se rritja “do të jetë njëkohësisht inflacioniste dhe e dëmshme për punësimin.” / Bloomberg
Postimi ” Rritja 4.1% e pagës minimale rrezikon objektivat e Britanisë për inflacionin ” eshte marre nga Revista Monitor.
