Yield-i bonove 12-mujore të thesarit i është kthyer rënies në ankandin e kësaj jave, pas një korrektimi në lehtë në rritje gjatë muajit janar. Sipas informacionit të bankës së Shqipërisë, yield-i mesatar i ponderuar ra lehtë në 2.79%, nga 2.81% që kishte qenë në ankandin e mëparshëm, në fund të muajit janar.
Nga 12.5 miliardë lekë që kishte qenë shuma e shpallur për financim nga qeveria shqiptare, kërkesa në ankand rezultoi pak më e lartë se 13 miliardë lekë. Pro rata apo pjesa e pranuar ishte relativisht e ulët, në nivelin 27.02%.
Yield-et e bonove të thesarit po vazhdojnë edhe këtë vit rënien me bazë vjetore. Një vit më parë, yield-i i bonove 12-mujore kishte qenë 3.63%. Rënia e yield-it të bonove 12-mujore (0.84 pikë përqindje në një vit) është edhe më e madhe se rënia e normës bazë, që në krahasim me një vit më parë është ulur me 0.5 pikë përqindje.
Kjo tregon se spreadi-i mes normës bazë dhe yield-it të këtyre instrumenteve është ngushtuar dhe ndodhet në nivelet më të ulëta historike. madje, në muajin dhjetor 2024, për herë të parë yield-et e bonove 12-mujore zbritën poshtë normës bazë të interesit. Ndërkohë, edhe bonot me maturim më afatshkurtër në emetimet e rralla të muajve të fundit kanë qëndruar vazhdimisht poshtë normës bazë të interesit.
Pritej që në tremujorin e parë të këtij viti yield-et të shënonin një korrektim të lehtë në rritje, edhe për shkak se në këtë periudhë të vitit kërkesa e qeverisë për financim arrin përqendrimin më të lartë vjetor.
Sipas kalendarit të emetimeve të Ministrisë së Financave, huamarrja e planifikuar do të ketë vlerën e 132.5 miliardë lekëve. Kjo shumë përbën më shumë se 37% të gjithë vlerës së parashikuar të emetimeve në tregun e brendshëm për vitin 2025.
Yield-i i bonove 12-mujore është instrumenti kryesor benchmark edhe për kreditimin e sektorit privat. Kreditë afatgjata në lekë zakonisht çmohen bazuar në ecurinë e yield-it të këtyre insturmenteve, të cilit i shtohet edhe një marzh fiks. Rënia e yield-it të bonove përcillet edhe në norma më të ulëta interesi të kredive për sektorin privat. Çmimi i lirë i kredisë ishte një ndër elementët që mbështeti rritjen e shpejtë të kreditimit të ekonomisë vitin e kaluar.
Portofoli i kredisë për ekonominë në fund të vitit 2024 arriti vlerën e 835.6 miliardë lekëve. Vetëm gjatë muajit dhjetor, vlera e portofolit u rrit me më shumë se 11 miliardë lekë. Me bazë vjetore portofoli total i kredisë u rrit me 12.3%. Rritja e portofolit pothuajse u trefishua në raport me rritjen e vitit të kaluar. Kjo është rritja më e lartë e portofolit të kredisë në 15 vitet e fundit.
Rritja vjetore e portofolit total për bizneset ishte 11.4%, ndërsa për individët rritja ishte 13.5%. / E.Shehu
Postimi ” Rritja e yield-eve nuk zgjat, bonot 12-mujore bien përsëri në 2.79% ” eshte marre nga Revista Monitor.
