Spiro Lengo rrëfen sfidat e përfshirjes në industrinë e përpunimit të mishit, nga punët e para në shitje dhe në fermën e rritjes së kafshëve deri në marrjen e një prej posteve drejtuese në kompaninë KMY, pas përfundimit të studimeve të larta jashtë Shqipërisë.
I angazhuar që në moshën 14-vjeçare në biznes, për të vijuar edhe pas përfundimit të studimeve të larta jashtë, tashmë, prej disa vitesh në pozicionin e menaxherit të përgjithshëm të kompanisë “Kombinati i Mishit”, Spiro Lengo rrëfen rrugëtimin në biznesin e themeluar nga babai i tij, zoti Gregor Lengo.
Punët e tij të para në biznesin familjar përkojnë në sektorin e shitjeve me pakicë apo në fermat e rritjes së kafshëve, për të arritur, hap pas hapi, deri në drejtimin e departamenteve kryesore të aktivitetit.
“Si unë dhe motra ime Jona në familje jemi rritur me frymën e biznesit të prindërve. Fillimisht, në moshë më të vogël, kemi punuar si në dyqanet e pakicës edhe në fermat e prodhimit.
Më pas u nisa për studime jashtë Shqipërisë, por me frymën për t’u kthyer dhe për të punuar në biznesin e ngritur nga prindërit.
Gjatë periudhës së studimeve, të gjithë sektorët e kompanisë janë drejtuar nga babai, ndërsa nëna ishte drejtuese e departamentit të financave. Pas përfundimit të studimeve, unë dhe motra u kthyem në Shqipëri për të punuar në sipërmarrjen familjare.
Për të dy u caktua drejtimi i dy departamenteve më të mëdha të kompanisë. Motra Jona mori drejtimin e shitjeve në supermarkete, ndërsa unë sektorin e përpunimit të mishit dhe investimeve. Prej vitesh, angazhimi im në kompani është me kohë të plotë”.
Roli i bashkudhëheqësit, në një biznes familjar, i ka dhënë Spiro Lengos përparësi për të zhvilluar ambiciet për investime bashkëkohore, me qëllim rritjen e produktivitetit dhe ofrimin e shërbimit ndaj klientëve, sipas standardeve të vendeve anëtare të BE-së.
“Në një biznes familjar, kur ndarja e punëve për secilin anëtar caktohet nga babai, i cili është në rolin e drejtorit të përgjithshëm, të krijon lirshmërinë për të ecur para, për të zhvilluar ambiciet që do të çojnë në rritjen e departamentit që drejton.
Ambiciet e mia janë për të zhvilluar investime afatgjata, që pritet të nisin brenda tre viteve. Parashikohen investime për teknologjinë e prodhimit, në dhomat frigoriferike sipas standardeve më të fundit të Bashkimit Europian, në zinxhirin e transportit të produkteve, paketimin dhe shërbimin ndaj klientit”.
Të rinjtë që kanë studiuar jashtë dhe kthehen të punojnë në sipërmarrjet e tyre familjare, sipas z. Lengo, janë avantazh për biznesin, pasi bashkë me përfshirjen e tyre, përcillet edhe fryma inovative në investime dhe shërbim, për t’iu përgjigjur kërkesës së kohës.
“Të rinjve që përshihen në këtë sektor iu hapen shumë rrugë për të ecur përpara, nisur nga zhvillimi ekonomik i vendit dhe kërkesa e konsumatorëve, e nxitur nga rritja e turizmit.
Rritja e fluksit të turistëve të huaj dhe ardhja e shumë markave të hoteleve më të mira ndërkombëtare, na nxit për prodhime më cilësore.
Kompania jonë, përveç prodhimit të produkteve të përpunuara nga mishi vendas, importon edhe mish të freskët nga jashtë apo produkte të gatshme nga vendet e BE-së.
Nga ana tjetër, investimet në teknologji, në dhoma frigoriferike, në sektorin e paketimit dhe në logjistikën e transportit, kanë rritur kostot, të cilat janë të përballueshme, duke qenë se kërkesa për konsum është në rritje”.
Nisur nga përvoja e tij në këtë sektor, z. Lengo iu rekomandon të rinjve të investojnë në fermat për rritjen e kafshëve, pasi blegtoria është e ardhmja e Shqipërisë.
“Konstatoj me keqardhje se sot në Shqipëri nuk ka shumë të rinj që dëshirojnë të investojnë në ngritjen e fermave për rritjen e kafshëve. Rritja e kafshëve është një fushë e vështirë që mbi të gjitha kërkon vullnet dhe durim, pasi gjatë gjithë kohës duhet të jesh i pranishëm në fermë.
Zhvillimi i teknologjisë po i largon të rinjtë nga blegtoria. Ata kërkojnë kryesisht të përfshihen në biznesin e teknologjisë. Nuk iu vë faj! Nga ana tjetër, që të merresh me blegtori, duhet të jesh rritur me këtë frymë, brez pas brezi.
Ashtu siç ka ndodhur në vendet më të zhvilluara të BE-së.
Tre brezat e parë të drejtuesve të fabrikave të përpunimit të mishit kanë qenë fermerë. Drejtimi i fabrikave ka kaluar te brezi i katërt i trashëgimtareve. Në Shqipëri ekziston perspektiva për zhvillimin e blegtorisë nga të rinjtë.
Prandaj, në bisedat që ndaj me ta, gjithmonë ju sugjeroj të investojnë në fermat për të rritur kafshët, sepse kjo është e ardhmja e Shqipërisë”.
Pak kohë më parë, kompanitë kryesore të përpunimit të mishit ngritën shqetësimin se po vijojnë të humbasin konkurrueshmërinë në rajon, prej vitit 2007, ku sipas marrëveshjes CEFTA, shtetet si Serbia, Maqedonia e Veriut, Bosnjë-Hercegovina, Mali i Zi dhe Kosova, importojnë mishin si lëndë të parë nga Europa me taksë doganore zero.
Shqipëria është e vetmja që e eksporton me taksë 10%. Po ashtu, këto shtete eksportojnë drejt Shqipërisë me taksë zero.
Për debatin e taksës 10% të importit të mishit nga BE, ndërkohë që vendet fqinje importojnë me tarifë zero, menaxheri i përgjithshëm i kompanisë KMY, z. Lengo, thotë se kjo i ka dëmtuar në raport me humbjen e konkurrueshmërisë te fqinjët, por heqja e saj do të jetë çështje kohe, deri në përafrimin e legjislacionit për anëtarësimin e vendit në BE./ Dorina Azo
Rekomandimi
Nisur nga përvoja e tij në këtë sektor, z. Lengo iu rekomandon të rinjve të investojnë në fermat për rritjen e kafshëve, pasi blegtoria është e ardhmja e Shqipërisë. “Konstatoj me keqardhje se sot në Shqipëri nuk ka shumë të rinj që dëshirojnë të investojnë në ngritjen e fermave për rritjen e kafshëve. Rritja e kafshëve është një fushë e vështirë që mbi të gjitha kërkon vullnet dhe durim, pasi gjatë gjithë kohës duhet të jesh i pranishëm në fermë.
Postimi ” Rrugëtimi i brezit të dytë të sipërmarrësve të mishit ” eshte marre nga Revista Monitor.
