Departamenti Amerikan i Tregtisë do të propozojë një ndalim të shitjes ose importit të automjeteve inteligjente, që përdorin teknologji specifike kineze ose ruse për shkak të shqetësimeve të sigurisë kombëtare, sipas zyrtarëve amerikanë.
Një hetim i qeverisë amerikane, që filloi në shkurt zbuloi një sërë rreziqesh të sigurisë kombëtare nga softueri dhe hardueri i integruar nga Kina dhe Rusia në automjetet amerikane, duke përfshirë mundësinë e sabotimit në distancë duke hakeruar dhe mbledhjen e të dhënave personale për shoferët, tha Sekretarja e Tregtisë Gina Raimondo.
Rregulli nuk do të zbatohet për makinat në përdorim në SHBA që kanë tashmë të instaluar softuer kinez. Ndalimi i softuerit do të hyjë në fuqi për automjetet për “vitin model” 2027 dhe ndalimi i harduerit për “vitin model” 2030, sipas Departamentit të Tregtisë.
Veprimi rregullator i propozuar është pjesë e një lufte shumë më të gjerë midis Shteteve të Bashkuara dhe Kinës, dy ekonomitë më të mëdha në botë, për të siguruar zinxhirët e furnizimit të teknologjisë kryesore informatike të së ardhmes, nga gjysmëpërçuesit tek softueri i IA.
Kina, në veçanti, ka investuar shumë në tregun e makinave, dhe ndërhyrjet e bëra nga prodhuesit kinezë në Europë kanë shqetësuar zyrtarët amerikanë.
Rregulli i propozuar i Departamentit të Tregtisë është mbi “automjetet e lidhura”, një term i gjerë për pothuajse çdo makinë, autobus ose kamion modern që përdor lidhjet e rrjetit për asistencë në rrugë, komunikime satelitore ose një sërë veçorish të tjera. Ai mbulon harduerin dhe softuerin që ndërveprojnë me teknologjinë kryesore, që lejon një automjet të komunikojë me botën e jashtme, si Bluetooth, WiFi dhe teknologjinë celulare.
Zyrtarët amerikanë janë të shqetësuar se stacionet e karikimit elektrik dhe infrastruktura tjetër e pajisur me harduer ose softuer të caktuar mund të shfrytëzohen nga hakerat që kanë lidhje me Kinën, Rusinë ose fuqi të tjera të huaja.
Në qershor, departamenti ndaloi shitjen dhe ofrimin e produkteve dhe shërbimeve të caktuara të bëra nga firma ruse e sigurisë kibernetike Kaspersky Lab, programi antivirus i së cilës përdoret nga qindra miliona njerëz në mbarë botën. / CNN
Postimi ” SHBA propozon ndalimin e makinave smart me teknologji kineze dhe ruse ” eshte marre nga Revista Monitor.
