Në Bashkimin Europian, shitjet në janar ranë me 2.6% edhe pse shitjet e makinave elektrike me bateri (BEV) dhe hibride (HEV) u rritën përkatësisht me 34% dhe 18.4%
Shitjet e makinave tërësisht elektrike në Europë u rritën me 37.3% në muajin janar, tregojnë të dhënat e sektorit të martën, edhe pse rritja e fortë nuk ishte e mjaftueshme për të kompensuar rënien e makinave me benzinë dhe naftë, duke i lënë shitjet e përgjithshme me 2.1%.
Të dhënat e Shoqatës Europiane të Prodhuesve të Automobilave (ACEA) tregojnë se marka tërësisht elektrike Tesla regjistroi rënie prej 45.2% në Bashkimin Europian, në Britaninë e Madhe dhe në Zonën Europiane të Tregtisë së lirë, ndërsa shitjet e konkurrentit kinez SAIC Motor, që zotëron markën MG, u rritën me 36.8%.
Pse është e rëndësishme
Ekzekutivi i BE-së do të prezantojë planet për sektorin automobilistik më 5 mars, pas bisedimeve me prodhuesit e automjeteve, sindikatat dhe grupet e interesit.
Prodhuesit e automobilave në BE, që po luftojnë për të konkurruar me rivalët kinezë dhë po përgatiten për tarifat amerikane, kërkojnë nga Komisioni t’i lehtësojë nga gjobat e mundshme si pasojë e objektivave të emetimit të makinave CO2 që hynë në fuqi në janar.
Disa shtëpi automobilistike po rrisin çmimet e modeleve të makinave me motor me benzinë për të rritur përdorimin e automjeteve elektrike, por industria ka frikë se klientët thjesht do të blejnë më pak makina.
Ndërkohë, grupet e transportit elektrik thonë se çdo nxitje për të dobësuar objektivat do të shkatërrojë investimet në infrastrukturën e automjeteve elektrike dhe do të pengojë konkurrencën e bllokut.
Shifrat
Shitjet në janar në BE, në Britaninë e Madhe dhe në EFTA ranë lehtë nën 1 milion makina të shitura, volumi më i ulët nga gushti.
Shitjet e Volkswagen dhe Renault u rritën përkatësisht me 5.3% dhe 5.4%, ndërsa shitjet e Stellantis ranë me 16%.
Në Bashkimin Europian, shitjet në janar ranë me 2.6% edhe pse shitjet e makinave elektrike me bateri (BEV) dhe hibride (HEV) u rritën përkatësisht me 34% dhe 18.4%, ndërsa shitjet e makinave hibride plug-in (PHEV) u tkurrën me 8.5%.
Makinat elektrike BEV, HEV apo PHEV – të shitura në BE përfaqësojnë 57.2% të shitjeve të automjeteve në janar, krahasuar me 47.4% në vitin e kaluar.
Ndërsa po luftojnë për të reduktuar kostot e larta në tregjet vendase dhe konkurrencën nga Kina, shtëpitë automobilistike europiane po përgatiten për t’u përballur me tarifat e mundshme të importit të vendosura nga presidenti i SHBA-së, Donald Trump.
Trump ka rritur taksat për aluminin dhe çelikun dhe ka kërcënuar me një tarifë prej 25% për importet nga Meksika dhe Kanadaja, si dhe për të gjitha autoveturat dhe gjysmëpërçuesit.
/ Reuters
Postimi ” Shitjet e makinave në Europë bien në janar ” eshte marre nga Revista Monitor.
