Shkalla e shfrytëzimit të kapaciteteve në ekonomi shfaqi një tendencë rënëse në tremujorin e tretë të këtij viti.
Sipas vrojtimit periodik të Bankës së Shqipërisë, vlerësimet e bizneseve për gjendjen financiare dhe normën e shfrytëzimit të kapaciteteve kanë rënë lehtësisht krahasuar me nivelin e tremujorit të dytë. Megjithatë, ato mbeten mbi nivelin e mesatares historike përkatëse.
Rënia e vlerësimeve të biznesit për shkallën e shfrytëzimit të kapacitetit prodhues ishte në linjë edhe me ecurinë e treguesi të ndjesisë ekonomike, që ra me 1.3 pikë në muajin shtator. Rënia u ndikua kryesisht nga ulja e besimit në sektorin e tregtisë dhe industrisë.
Niveli aktual i treguesit të ndjesisë së ekonomike mbetet 7 pikë mbi mesataren afatgjatë, por ecuria e këtij treguesi gjatë vitit 2025 është shfaqur më e luhatshme.
Shfrytëzimi më i ulët i kapaciteteve prodhuese, në vija të përgjithshme, përputhet edhe me një ngadalësim të ritmeve të rritjes ekonomike gjatë këtij viti. Të dhënat e INSTAT treguan se për 3-mujorin e dytë të vitit ekonomia shqiptare u rrit me 3.5%, normë kjo më e ulët se rritja e rishikuar prej 3.7% e tremujorit të parë. R
ritja mesatare prej rreth 3.6% e gjysmës së parë të vitit tregon një rritje më të ulët, krahasuar me rritjen e vlerësuar ekonomike prej afërsisht 4% të vitit 2024.
Ekonomia shqiptare vazhdon të vuajë rënien e sektorëve të saj prodhues. Bujqësia dhe industria janë në rënie prej disa tremujorësh radhazi. Nga ana tjetër, shërbimet dhe ndërtimi, që kanë dhënë kontributin kryesor në rritjen ekonomike në vitet e fundit, duket se e kanë ngadalësuar ritmin e rritjes në gjysmën e parë të këtij viti.
Kjo ka bërë që rritja ekonomike të rezultojë më e vogël krahasuar me vitin e kaluar. Deri tani, projeksionet e analistëve financiarë e vendosin rritjen ekonomike të Shqipërisë për vitin 2025 në nivelet e 3.5%-3.6%.
Në analizën e raportit të politikës monetare për tremujorin e tretë, Banka e Shqipërisë vlerësonte se ritmi i rritjes ekonomike erdhi në ngadalësim, duke pasqyruar sidomos një frenim të ritmit të zgjerimit të kërkesës së brendshme.
Në analizën e saj, Banka e Shqipërisë parashikon se ritmi i rritjes së ekonomisë pritet të jetë disi më i ngadaltë në krahasim me vitet e shkuara. Ky parashikim është i ndikuar nga një ecuri e ngjashme në ekonominë e Eurozonës, por edhe nga afrimi i ekonomisë shqiptare me kapacitetet e saj prodhuese.
Ky konkluzion i Bankës së Shqipërisë lë të kuptohet se aktualisht potenciali i rritjes së ekonomisë shqiptare mund të jetë pranë atyre niveleve që kanë rezultuar në gjysmën e parë të këtij viti./ E.Shehu
Postimi ” Shkalla e shfrytëzimit të kapaciteteve në ekonomi pësoi rënie në tremujorin e tretë ” eshte marre nga Revista Monitor.
