Shqipëria dhe Greqia kanë firmosur një aksion plan në fushën e turizmit që synon më shumë bashkëpunim dhe promovimin e këtij sektori si një paketë e vetme për tregun e Evropës Lindore. Zv.Ministrja greke e Turizmit, Sophia Zacharaki , zbuloi më shumë për këtë plan, ku theksoi se ndër të tjera qëllim është dyfishimi i turistëve grekë që vizitojnë Shqipërinë.
“Dy vendet kanë punuar në një marrëveshje të përbashkët që e kanë nënshkruar viter më parë dhe që është rifreskuar. Ajo bazohet më shumë në ekoturizëm, agroturizëm, gastronomi dhe turizmin fetar. Ekoturizmi është një pjesë e aksionplanit dhe e dyta është si të promovojmë turizmin e të dy vendeve dhe të zgjerojmë ofertën për turistët nga Evropa Lindore. Duhet të marrim avantazh ndaj këtyre vendeve dhe të promovojmë turizmin e Greqisë dhe të Shqipërisë si rajon, në të gjithë botën” deklaroi Sophia Zacharaki, Zv.Ministre e Turizmit në Greqi.
Sipas saj, rëndësi e veçantë do ti kushtohet edukimit dhe trajnimit të burimeve njerëzore në sektorin e turizmit.
“Po punojmë për edukimin në turizëm dhe të dy vendet mund të përfitojnë nga një kapital i mrekullueshëm njerëzor që është kryesisht moshë e re. Duhet më shumë punë në agroturizëm, ka shumë potencial për zhvillimin e agroturizmit dhe ne kemi shumë eksperiencë në këtë drejtim dhe e shohim që po funksionon. Sidomos pas pandemisë, njerëzit duan të jenë më afër me natyrën. Ne nuk duhet të jemi sezonal, por që të kemi burime të qëndrueshme humane, duhet të punojmë për zgjatje të sezonit” vijoi ajo.
Aksionplani do të nisë të vihet në jetë në fund të vitit 2023, për t’i paraprirë sezonit të ardhshëm turistik. Përgjatë vitit 2022, Shqipëria është vizituar nga 480 mijë turistë grekë.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
