Viti i ri nisi me mot të stuhishëm. Turbinat me erë funksiononin me shpejtësi maksimale dhe në shumë vende, dielli shkëlqente. Si rezultat, prodhimi i energjisë elektrike nga energjitë e rinovueshme në Gjermani përbënte 125% të kërkesës, sipas Institutit Fraunhofer për Sistemet e Energjisë Diellore.
Furnizimi i tepërt uli çmimin e energjisë elektrike në bursat, ku çmimet përcaktohen nga oferta dhe kërkesa dhe për disa orë energjia elektrike ishte edhe falas.
Në vitin 2024, mesatarisht 59% e energjisë elektrike në Gjermani prodhohej nga burime të rinovueshme. Por gjatë errësirës së dimrit, ky rezultat nuk është aspak i mjaftueshëm. 12 dhjetori 2024 shënoi një pikë të ulët, kur vetëm 18% e nevojave të Gjermanisë për energji elektrike plotësoheshin nga burimet e rinovueshme. Pjesa tjetër duhej të gjenerohej nga termocentralet me qymyr dhe gaz, dhe importet e energjisë elektrike nga vendet fqinje të BE-së.
BE-ja ka një treg të përbashkët të energjisë elektrike. Kjo do të thotë se gjatë periudhave me erë të fortë dhe diell, Gjermania është në gjendje të eksportojë energji, ndërsa gjatë periudhave me pak erë dhe diell, duhet të importojë energji. Pjesa më e madhe e energjisë elektrike, që Gjermania bleu në vitin 2024 erdhi nga Franca, e cila plotëson 70% të nevojave të saj për energji me energjinë bërthamore, që është në dispozicion gjatë gjithë vitit.
Importet dhe eksportet bazohen në çmimet aktuale në Bursën Europiane të Energjisë. Përveç kësaj, konsumatorët duhet të paguajnë taksat. Në Gjermani, rreth 30% e çmimit të energjisë elektrike përbëhet nga tarifat e rrjetit. Kjo i referohet kostos së zgjerimit të rrjetit të energjisë. Taksat dhe tatimet përbëjnë rreth një të tretën tjetër.
Çmimet e energjisë elektrike për familjet dhe kompanitë
Familjet dhe kompanitë mezi i kanë vënë re luhatjet e çmimeve sepse shpesh kanë kontrata afatgjata të energjisë elektrike. Ata paguajnë furnizuesit e tyre të energjisë elektrike një çmim fiks për një periudhë të caktuar kohore, siç është rënë dakord në një kontratë.
Sidoqoftë, që nga fillimi i vitit 2025, furnitorëve u është dashur gjithashtu të ofrojnë tarifa dinamike me çmimet aktuale. Në këtë mënyrë, klientët që përdorin sasi të mëdha të energjisë elektrike, për shembull, për të karikuar makinat elektrike ose për të drejtuar pompat e nxehtësisë, kanë pasur një nxitje financiare që të planifikojnë konsumin e tyre të energjisë në kohën kur furnizimi është i lartë dhe si rrjedhojë çmimet janë të ulëta.
Në vitin 2024, prodhimi i energjisë elektrike nga qymyri i murrmë vazhdoi të bjerë me 8% në Gjermani, ndërsa qymyri i zi ra me më shumë se 27%. Që nga viti 2015, përqindja e energjisë së prodhuar nga qymyri pothuajse është përgjysmuar, duke ulur ndjeshëm emetimet e CO2.
2024 ishte gjithashtu viti i parë që Gjermania ishte në gjendje të bënte pa prodhuar asnjë nga fuqitë e saj bërthamore. Tre termocentralet e fundit bërthamore, të cilat u mbyllën në vitin 2023, përbënin 6% të prodhimit të energjisë elektrike.
Ekonomia dhe çmimet e energjisë elektrike
Askund në Europë energjia elektrike nuk është më e shtrenjtë se në Gjermani. Sipas Zyrës Federale të Statistikave, një familje prej tre deri në katër anëtarë duhej të paguante pak më pak se 40 cent për kilovat orë në vitin 2024. Në Hungari dhe Bullgari, nga ana tjetër, ku energjia elektrike subvencionohet nga shteti, konsumatorët duhej të paguanin vetëm 10 cent për kilovat orë.
Edhe Gjermania ka subvencione, por vetëm për kompanitë industriale. Megjithatë, kompanitë që përdorin shumë energji janë ankuar se kostot e energjisë janë ende shumë të larta, që ato të jenë konkurruese.
Ndërsa industria po paguante ende rreth 12 cent për kilovat orë në vitin 2021, çmimi arriti kulmin në më shumë se 50 cent në 2022 pas pushtimit rus të Ukrainës. Më 1 korrik 2022, taksat u ulën ndjeshëm për kompanitë.
Sot bizneset industriale paguajnë rreth 17 cent. Megjithatë, kjo është dukshëm më e lartë se ajo, që paguajnë kompanitë në vendet e tjera konkurrente të mëdha. Në vitin 2023, për shembull, kompanitë në industrinë gjermane të automobilave paguanin dy herë më shumë për energji elektrike sesa konkurrentët e tyre në Kinë dhe pothuajse tre herë më shumë se kompanitë e krahasueshme në SHBA. Ulja e ndjeshme e çmimeve të energjisë elektrike mbetet një nga kërkesat më urgjente ekonomike.
Ajo që mbetet e qartë është se zgjerimi i vazhdueshëm i energjive të rinovueshme, rrjeteve të energjisë elektrike dhe objekteve të magazinimit do të mbeten të kushtueshme për shumë vite në vijim. Vetëm pasi të jetë vendosur infrastruktura do të ndihen përfitimet financiare të energjisë së erës dhe diellit. / DW
Postimi ” Si Gjermania kërkon të ulë kostot e energjisë elektrike ” eshte marre nga Revista Monitor.
