Brenda vitit të ardhshëm 11 bankat tregtare që operojnë në vend do të kenë një rregullore të posaçme në lidhje me standardet apo kriteret që duhet të përmbushin në drejtim të sigurisë kibernetike. Objektivi është përcaktuar në strategjinë afatmesme të zhvillimit të Bankës së Shqipërisë për periudhën 2023-2025.
“Sigurisht ky është një lajm i mirë. Vjen edhe si i imponuar nga kushtet për procesin e integrimit në Bashkimin Europian”, thotë për A2 CNN Anila Hyka Smorgrav, eksperte e sistemit financiar.
Në strategji parashikohet se Banka Qendrore do të adoptojë standardet ndërkombëtare për vlerësimin e mjaftueshmërisë së perimetrit të sigurisë ndaj sulmeve kibernetike, të vijueshmërisë së veprimtarisë së subjekteve të licencuara dhe një rritje të bashkëpunimit me bankat në mbrojtjen ndaj sulmeve kibernetik. Po sa e mundur është siguria kibernetike vetëm me plotësimin e kuadrit ligjor.
Aktualisht, Banka e Shqipërisë nuk ka një rregullore të posaçme në lidhje me standardet apo kriteret që duhet të përmbushin bankat tregtare lidhur me sigurinë kibernetike.
Përdorimi i teknologjisë së informacionit dhe komunikimit nga bankat rregullohet kryesisht nga rregulloret e brendshme.
Burimi: A2 CNN
