Korporata Elektroenergjetike Shqiptare ka përzgjedhur kompaninë që do të kryejë furnizimin me karburant për testimin e TEC-eve lundrues që ndodhen në Vlorë. Pas shpalljes së tenderit, në fillim të muajit shkurt, KESH bën me dije se fituese është shpallur kompania Europetrol Durrës Albania, por oferta e saj nuk është bërë publike.
Më herët, Korporata bëri me dije për TV se me sigurimin e karburantit do të nisë testimi i TEC-eve lundrues, ndërkohë që në fund të marsit është parashikuar dhe testi i besueshmërisë prej 72 orëve ku të gjithë agregatët së bashku do të punojnë pa ndërprerje.
“Me marrjen e sasisë së naftës, do të fillojë dhe testimit i të gjithë agregateve në mënyrë individuale, për të shkuar më pas te testi i besueshmërisë 72 orësh për të gjithë agregatët”, – deklaroi KESH. Sipas procedurës tenderuese, synohej blerja e 4000 ton karburant e domosdoshme vetëm për testimin dhe jo funksionimin e mëtjeshëm të këtyre impianteve.
Po ashtu, në dokumentet e tenderit KESH specifikonte se 2 TEC-et lundrues kanë nevojën e furnizimit me lëndë djegëse të llojit HFO, me përmbajtje të squfurit jo më të madhe se 0.5%.
Këto impiante të prodhimit të energjisë nga karburanti u tenderuan përmes një procedure emergjente në kuadër të krizës energjetike gati 2 vite më parë, por deri më tani ato nuk janë vënë në punë. Ndërkohë që, KESH ka deklaruar se pas testimit të tyre do të vendoset nëse do të merren në dorëzim dhe do të nisë pagesa e qirasë sipas kontratës.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
