Në kushtet kur tendenca për kreditim është në rënie për shkak të rritjes së normës bazë të interesit dhe shtrëngimit të kushteve të kredidhënies nga sistemi bankar, ekspertja e tregut financiar Erjola Spahiu, sugjeron që qeveria të ndihmojë biznesin e vogël në mënyrë që të mos shkohet drejt mbylljes së tyre.
“Kam shqetësim për bizneset e vogla, nëse nuk bëjmë dot mirë, të paktën të mos bëjmë asnjë ndryshim për biznesin e vogël. Këto masat të shtyhen më tej për profesionet e lira. Se biznesi i vogël dhe profesionet e lira do të impaktohen më shumë, preket konsumi, kanë kreditë për të paguar do kemi mbyllje të bizneseve të vogla. Shpresoj që të jetë e përkohshme situata, në të kundërt do kemi efekte vitin e ardhshëm”.
Sipas Spahiut, tremujori i parë i viti të ardhshëm do të jetë më i vështirë, por hezitimi për të marrë kredi dhe shtrëngimi i kushteve të kredisë bëhet sensitiv për një individ dhe biznes.
“Nëse në qershor të këtij viti do kishte marrë kredi 50 mijë euro do kishte interes 125 euro në muaj, nëse shkon sot merr një kredi për të njëjtën shumë automatikisht vetëm nga norma bazë e euroborit norma e interesit shkon në 245 euro për efektin e normës bazë të interesit. Bankat perceptojnë risk të shtuar po reflektojnë një marzh të caktuar për të mbuluar koston e riskut”.
Edhe eksperti Artan Gjergji sugjeron që biznesi të formatojë pritshmëritë dhe të investojë në burime njerëzore. Ndërsa qytetarët i këshillon që të mos kryejnë investime të mëdha përveç atyre imediate.
“Agjentët ekonomikë përveç shqisave duhet të kuptojnë tregjet financiare të bëjnë projeksione ekonomike e financiare. Bizneset të formatojnë vetveten e buxhetet e tyre dhe të bëhen më të zgjuar. Në tremujorin e tretë të 2023 ekonomia të hyjë në trajektoren e normales. Qytetarët investime te mëdha t’i mbajnë pezull, të drejtohen për kredi konsumatore për nevoja imediate, jo në investime radikale për financat e brishta. Të mbyllin një pjesë të të principalit të tyre”.
Burimi: A2 CNN
