Shteti ka vijuar të paguajë interesat për kredi të buta të dhëna për blerje banese për 5644 familje në një vlerë prej 45.9 milionë lekë.
Raporti mesvitit i buxhetit 2024 i publikuar pak kohë më parë nga Ministria e Financave tregon se kreditë e reja të përfituara me interes të subvencionuar ishin të dedikuara për 104 familje me një vlerë 13 milionë lekë deri në fund të prillit sipas shifrave të fundit të raportuara.
Konkretisht programi strehimi që menaxhohet nga Ministria e Ekonomisë Kulturës dhe Inovacionit (MEKI)_dhe që ndalet si tek banesat e blera me kredi që iu subvencionohet interesi dhe banesa sociale me qira, ka disa tregues të raportuar.
“Programi “Strehimi” ka si objektiv të sigurojë strehim të përshtatshëm e të përballueshëm për individë e familje që nuk përballojnë dot kostot e tregut të banesave. Sa i takon realizimit të 4M 2024 mund të rendisim sa më poshtë: 5 644 familje kanë përfituar nga subvencionimi i interesave për kreditë ekzistuese, në vlerën 45.9 milion LEK.
Janë 104 familje kanë përfituar subvencionim të interesave për kredi të reja me vlerën 13 mln LEK. Rreth 315 familje kanë përfituar subvencionim të qirasë në tregun e lirë sipas Ligjit nr.22/2018, i ndryshuar me një vlerë prej 10.4 milion LEK. Po kështu 120 familje kanë përfituar subvencionim për shpronësimin nga ndërtimi i Unazës së madhe me një kosto prej 7.2 milion lekësh” thuhet në raportin e buxhetit.
Në muajin korrik të këtij viti MEKI njoftoi hapjen e aplikimeve për 300 punonjës të administratës që do të trajtohen me kredi të lehtësuar me interes “0”. Aplikimet u mbyllën në 14 gusht. Sipas ministrisë kushti për aplikantët ishte që të ishin të punësuar në institucionet e administratës publike, sipas kategorive: Ministria e Brendshme Ministria e Mbrojtjes; Ministria e Bujqësisë dhe Zhvillimit Rural; Ministria e Arsimit dhe Sportit; Ministria e Shëndetësisë dhe Mbrojtjes Social; Ministria e Ekonomisë, Kulturës dhe Inovacionit”.
Aplikimi edhe në këtë rast u bë përmes portalit e-Albania ku personat e interesuar duhet të plotësonin një seri të dhënash në një formular të gatshëm. Pas dërgimit dhe mbylljes së aplikimeve tashmë mbetet në dorën e institucioneve për të miratuar listat përkatëse të përfituesve./N.Maho
Postimi ” Strehimi, buxheti vijoi të paguajë interesat e kredive për 5644 familje ” eshte marre nga Revista Monitor.
