Rrëzimi i vendimit nga Gjykata Kushtetuese për taksimin e profesioneve të lira me 15% për Flobens Dilaverin, ish-zëvendësdrejtor i përgjithshëm i Tatimeve është pozitiv. Për tv, Dilaveri ka thënë se shkalla e taksimit është relative, por ideale është niveli 9-11 %, i cili vendos barazi dhe nuk rëndon tatimpaguesit.
“U bë një tentativë për t’i rikthyer në skemë, sepse ishin parë dhe elementë abuzimi me kategori të caktura të profesionistëve të lirë, të cilët duke shfrytëzuar këtë hapësirë ndryshonin statuset ligjore në mënyrë që të përfitonin. Ai duhet të taksohet shkalla e taksimit është relative dhe gjykohet, por ajo që do të ishte ideale është niveli 9-11% i një takse të sheshtë, e cila vendos barazi dhe nuk i rëndon tatimpaguesit. Por që të vijojmë dhe të kemi kategori të cilat përjashtohen për efekte ekstra fiskale unë mendoj që nuk është e drejtë dhe krijojmë pabarazi e para dhe e dyta për kategori të caktuara mësohen për të mos paguar për vite të tëra në kurriz të shoqërisë” – thotë Dilaveri.
Ligji “Për tatimin mbi të ardhurat” me llogaritjet e këstit të parapagimit, shkaktoi debate te bizneset e profesioneve të lira, të cilët e konsideruan zbatimin e tij jokorrekt. Por, ndërkohë për të mos cënuar konkurrueshmërinë, Dilaveri thekson se sa më i qëndryeshëm të jetë një sistem taksimi, aq më shumë i shërben konsolidimit, pasi politikat fiskale të shpeshta krijojnë pasiguri ekonomike.
“Nuk janë të frikshme vetëm për bizneset apo për individët që ushtrojnë biznes dhe që në një farë mënyre kanë planet e tyre të biznesit, të cilat nuk bëhen as për 6 muaj as për 1 vit, por për të paktën 5 vjet. Kjo është e dëmshme dhe për vetë administratën tatimore dhe për vetë strukturat e saj që merren me mbledhjet e të ardhurave. Taksa sa më e qëndrueshme të jetë, aq më shumë i shërben konsolidimit fiskal dhe vetë biznesit”- thekson Dilaveri.
Ndërsa sa i takon reformës së pagave në administratë, e cila do të pasohet nga ajo e pensioneve, Dilaveri ka thënë se është hap pozitiv që duhet të vijohet edhe nga privati.
“Është një hap, i cili pundhënësit privat i bën që ta mendojnë, por në një farë mënyre është një garë, e cila do të vijojë gjithë kohën”- shton ish-zëvendësdrejtori i përgjithshëm i Tatimeve Flobens Dilaveri”.
Duke nisur nga data 1 korrik hyri në fuqi vendimi i qeverisë për rritjen e pagave për 135 mijë punonjës të administratës publike. Pagat do të rriten për të gjitha profesionet, duke bërë që paga mesatare në administratë të kalojë mbi 100 mijë lekë në muaj bruto.
Alida Lula /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
