Fizikani Richard Feynman besonte se çelësi i të mësuarit është thjeshtësia. Feynman punoi për Projektin Manhattan ndërkohë që ai ishte vetëm 20 vjeç.
Në vitin 1965, fizikani i shquar fitoi çmimin Nobel për punën e tij në elektrodinamikën kuantike, së bashku me Julian Schwinger dhe Sin-Itiro Tomonaga.
Feynman besonte se e vërteta qëndron te thjeshtësia dhe se gjërat janë më të lehta për t’u mësuar dhe për t’u mbajtur mend kur ato bëhen më të thjeshta.
Kur njohuritë tuaja për diçka të caktuar janë plot me shpjegime komplekse dhe me përkufizime të marra nga tekste të ndryshme, ka më pak gjasa që ju t’i kuptoni dhe t’i mbani mend ato njohuri.
Feynman mbahet mend edhe për thënien e tij të famshme: “Nuk duhet ta bësh veten për budalla dhe mos harro se je njeriu që mund të bëhesh për budalla shumë thjesht”.
Qëllimi i të mësuarit është që të kuptojmë më mirë botën. Por, në pjesën më të madhe të rasteve, mënyra se si ne mësojmë nuk na ndihmon për ta arritur këtë qëllim.
Shumë shpesh, ju thjesht mësoni diçka përmendësh ashtu siç është shkruar në libër ose siç jua ka shpjeguar mësuesi, kështu që nuk kalon shumë kohë dhe kjo njohuri zhduket.
Pikërisht këtu hyn në punë teknika Feynman.
Ideja e saj është që gjërat të bëhen aq të thjeshta sa kushdo të mund t’i kuptojë. Në këtë mënyrë, ju do të kuptoni më mirë temën që po studioni.
Teknika Feynman ka katër hapa.
- Zgjidhni një temë dhe filloni të studioni për të
Teknika e Feynman nuk kufizohet vetëm te temat e matematikës apo të fizikës. Ajo mund të aplikohet në çdo fushë.
- Shpjegojuani këtë temë një fëmije
Ky hap ju mundëson të kuptoni nëse e keni mësuar realisht temën që keni studiuar, apo nëse thjesht menduat se e kishit kuptuar.
Shpjegojeni konceptin me fjalët tuaja, sikur po përpiqeni t’ia mësoni atë një fëmije.
Kur përpiqeni t’i zbërtheni gjërat komplekse në ide të thjeshta me fjalë më të qarta, do të kuptoni nëse njohuritë tuaja për këtë temë janë të mjaftueshme apo jo.
Kjo e bën më të lehtë identifikimin e ndonjë boshllëku në njohuritë tuaja.
- Referojuni materialit që po studionit sa herë që ngecni
Vetëm kur arrini ta shpjegoni një temë të caktuar me terma të thjeshtë, atëherë e keni kuptuar me të vërtetë atë.
Kjo do të thotë se njohuritë do të qëndrojnë me ju dhe nuk do të zhduken asnjëherë, siç zhduken kur përpiqeni të mësoni diçka përmendësh.
Rishikoni shënimet tuaja dhe materialin që po studionit për çdo gjë që nuk arrini ta kuptoni ende.
Përpiquni t’ia shpjegoni atë vetes në një mënyrë sa më të thjeshtë. Nëse kjo gjë është shumë e vështirë ose nëse ju duhet me patjetër që të përdorni terma nga materiali që po studioni, atëherë kjo do të thotë se ende nuk e keni kuptuar siҫ duhet.
- Organizoni dhe rishikoni njohuritë
Mos u dorëzoni derisa të mund të bëni një shpjegim të thjeshtë dhe të natyrshëm.
Kthehuni te hapi i dytë dhe i tretë sa herë që të jetë e nevojshme.
Me shumë mundësi, kjo teknikë nuk do t’ju harxhojë aq shumë kohë sa mendoni.
