Shtimi i numrit të makinave në qarkullim dhe sezoni i ngarkuar veror, ku turistët qarkullojnë në të gjithë vendin, me mjete publike dhe sidomos me automjete me qira ka nxitur aktivitetin e tregtisë me pakicë në tremujorin e tretë të vitit.
Sipas të dhënave të publikuara nga INSTAT, Indeksi i volumit të shitjeve në tregtinë me pakicë, i llogaritur bazuar në deflatimin e indeksit të shitjeve në vlerë, arriti 136,7 duke shënuar një rritje 6,0%, krahasuar me tremujorin e tretë 2024. Ky tregues i përshtatur sezonalisht është rritur 1,4%, krahasuar me tremujorin paraardhës.
Rritja ka qenë më e fortë në tregtimin e karburanteve. INSTST njoftoi se në grupin “Tregti hidrokarbure në njësi tregtare të specializuara“, volumi i shitjeve është rritur me 8,6%, krahasuar me të njëjtin tremujor të vitit 2024.
Ndërsa në tregtinë me pakicë, pa përfshirë tregtinë me pakicë të hidrokarbureve, volumi i shitjeve në tremujorin e tretë 2025 është rritur me 5,2%, kundrejt tremujorit të tretë të vitit 2024.
Sipas INSTAT, në ndryshimin vjetor prej +6,0%, në tremujorin e tretë 2025 ndaj tremujorit të tretë 2024, në tregtinë me pakicë, grupet kanë kontribuar si më poshtë:
“Artikuj jo-ushqimore në njësi tregtare të specializuara dhe jo të specializuara” me +1,8 pikë përqindje. Grupi “Ushqime, pije e duhan në njësi tregtare jo të specializuara dhe të specializuara” ka kontribuar me +1,8 pikë përqindje dhe grupi “Tregti me pakicë e hidrokarbureve në njësi tregtare të specializuara” me +2,4 pikë përqindje.
Ndryshimet tremujore
INSTAT raportoi se në tremujorin e tretë 2025, volumi i shitjeve, përshtatur sezonalisht, në grupin “Tregti me pakicë, pa përfshirë tregtinë me pakicë të hidrokarbureve në njësi tregtare të specializuara”, është rritur me 1,3%, krahasuar me tremujorin paraardhës.
Në grupin “Tregti me pakicë hidrokarbure në njësi tregtare të specializuara“, volumi i shitjeve, i përshtatur sezonalisht është rritur me 3,4%, kundrejt tremujorit të mëparshëm.
Postimi ” Tregtia me pakicë po mbahet nga karburantet ” eshte marre nga Revista Monitor.
