Yield-et e borxhit të qeverisë shqiptare po e mbyllin në rënie të mëtejshme vitin 2024.
Sipas të dhënave nga Ministria e Financave, në ankandin e obligacioneve 5-vjeçare, të zhvilluar këtë javë, yield-i mesatar i ponderuar ra më tej në 3.91%, nga 4.34% që kishte qenë në ankandin e mëparshëm. Yield-i i këtyre instrumenteve ka rënë në nivelin më të ulët që nga marsi i vitit 2022.
Interesi i tregut për këto instrumente rezultoi përsëri mjaft i lartë. Nga tre miliardë lekë që kishte qenë shuma e shpallur për financim nga Ministria e Financave, vlera totale e kërkesave në ankand arriti në pothuajse 7.5 miliardë lekë.
Një tendencë e ngjashme e rënies së yield-eve është vërejtur në të gjitha instrumentet e borxhit të qeverisë. Rënia e inflacionit dhe ndryshimi i kahut të politikës monetare të bankës së Shqipërisë këtë vit është përcjellë shpejt edhe në tregun e bonove dhe obligacioneve. Banka e Shqipërisë e ka ulur dy herë normën bazë këtë vit, në muajt korrik dhe nëntor, duke e çuar në 3.75%.
Tregu financiar këtë vit është paraqitur mjaft likuid, ndërsa kërkesa e qeverisë për financim ka ardhur në rënie në tremujorin e fundit të vitit, veçanërisht në muajin dhjetor, që është edhe muaji me vlerën më të vogël të emetimeve gjatë vitit.
Nga ana tjetër, kërkesa për obligacionet referencë, ku përfshihen edhe obligacionet 5-vjeçare, këtë vit është rritur edhe nga pjesëmarrja e investitorëve të huaj. Për herë të parë, investitorë nga jashtë kanë investuar këtë vit në letrat e borxhit në lekë të qeverisë shqiptare. Obligacionet referencë janë përzgjedhur ndoshta për faktin se ato janë likuidë dhe çmimi i tyre në tregun dytësor është më i besueshëm, për shkak të detyrimit që kanë bankat zhvlluese të tregut për të kuotuar çmime ditore.
Me qëllim për të zhvilluar tregun dytësor të instrumenteve të borxhit të qeverisë shqiptare, në vitin 2018 Ministria e Financave dhe Banka e Shqipërisë nisën projektin e titujve referencë, në bashkëpunim me pesë banka tregtare në vend.
Pjesëmarrja në ankandet e titujve referencë mund të kryhet vetëm nëpërmjet bankave pjesëmarrëse në projekt, që kanë titullin e Zhvilluesve të Tregut. Titujt referencë (benchmark) gëzojnë likuiditet më të lartë se emetimet e zakonshme, për shkak të detyrimit që kanë Zhvilluesit e Tregut për të kuotuar çmime blerjeje dhe shitjeje në tregun sekondar, sipas kushteve të përcaktuara në kontratën e lidhur me Ministrinë e Financave.
Në këtë projekt aktualisht përfshihen emetimet e fundit të obligacioneve 3, 4 dhe 5-vjeçare. Kuotimi ditor i yield-it për tregtim sekondar u jep këtyre instrumenteve tipare më likuide, por njëkohësisht mundëson edhe vlerësimin e një çmimi më të drejtë.
Në vitin 2018, ku projekt u themelua me pjesëmarrjen e Bankës Kombëtare Tregtare (BKT) Credins Bank, Bankës Intesa Sanpaolo Albania, Bankës Amerikane të Investimeve (ABI Bank) dhe Bankës së Parë të Investimeve Shqipëri (Fibank). Që prej muajit korrik 2024, projektit i është bashkuar edhe Raiffeisen Bank.
Burimi: Ministria e Financave
Postimi ” Yield-et e mbyllin vitin në rënie të mëtejshme, obligacionet referencë zbresin në 3.91% ” eshte marre nga Revista Monitor.
