Yield-et e instrumenteve të borxhit të qeverisë shqiptare vijojnë rënien, duke ndjekur lëvizjet e politikës monetare të Bankës së Shqipërisë. Sipas informacionit të Bankës së Shqipërisë, në ankandin e kësaj jave yield-i uniform i obligacioneve dyvjeçare ra në 3.38%, nga 3.66% që kishte qenë në ankandin e mëparshëm, të muajit tetor.
Yield-i i obligacioneve dyvjeçare ka prekur nivelin më të ulët që prej korrikut të vitit 2022.
Kërkesa e investitorëve për titujt e qeverisë vazhdon të ngelet e lartë. Nga tre miliardë lekë që ishte shuma e shpallur për financim nga Ministria e Financave, kërkesat në ankand arritën në pothuajse 5.5 miliardë lekë. Pro rata ose pjesa e pranuar e kërkesave konkurruese rezultoi edhe njëherë e ulët, në nivelin 39.98%.
Yield-et bonove dhe obligacioneve këtë vit kanë ndjekur një tendencë në rënie. Dy uljet e normës bazë të interesit nga Banka e Shqipërisë, në muajt korrik dhe nëntor, janë reflektuar shpejt në këtë segment të tregut.
Por, rënia e yield-eve duket se lidhet edhe me gjendjen likuide të tregut financiar, rreziqet e ulëta të perceptuara nga investitorët dhe një cikël vjetor rënës i emetimeve të titujve qeveritarë gjatë vitit.
Sipas kalendarit të huamarrjes të Ministrisë së Financave, shuma e programuar për t’u financuar në tregun e brendshëm, (duke përfshirë edhe rifinancimet e instrumenteve të maturuar) do të ketë vlerën 68 miliardë lekëve, në rënie me 8.8% krahasuar me tremujorin e tretë dhe në rënie me 15% krahasuar me të njëjtën periudhë të një viti më parë. Pas ka realizuar pjesën më të madhe të huamarrjes në tremujorin e parë të vitit, kërkesa e qeverisë ka ardhur gradualisht në rënie gjatë tremujorëve në vijim.
Sektori bankar, që është financuesi kryesor i borxhit të brendshëm, vazhdon të jetë mjaft likuid, i mbështetur nga rritja e depozitave. Depozitat në monedhën vendase në fund të shtatorit ishin në rritje vjetore me 9%.
Gjendja e mirë e tregut financiar dhe perceptimi i ulët i rrezikut po reflektohet edhe në marzhe shumë të ulëta të yield-eve mbi normën bazë të interesit. Bonot me maturim më të shkurtër se një vit kanë zbritur poshtë nivelit të normës bazë të interesit, ndërsa ato me maturim 12-mujor dhe më gjatë kanë regjistruar marzhet më të ulëta historike mbi normën bazë.
Në skenarin më të mundshëm, pritet që presionet për rritjen e yield-eve të qëndrojnë të ulëta edhe vitin e ardhshëm. Nëse inflacioni vazhdon të qëndrojë poshtë objektivit, gjasat janë që norma bazë e interesit të pësojë ulje të mëtejshme vitin që vjen. Nga ana tjetër, edhe kërkesa e qeverisë për financim pritet të jetë e qëndrueshme, për shumë totale vjetore prej 50 miliardë lekësh, vlerë kjo e përafërt me vitin 2024.
Vitin e ardhshëm, ndërkohë, qeveria parashikon një dalje të re në tregjet ndërkombëtare për emetimin e një eurobondi të ri, me shumë të ngjarë qysh në tremujorin e parë të vitit./E.Shehu
Postimi ” Yield-et thellojnë rënien, obligacionet 2-vjeçare zbresin në 3.38% ” eshte marre nga Revista Monitor.
