Transformimi urban në hapësira publike i hyrjes së qytetit të Shkodrës pritet të kushtojë rreth 500 mln lekë. Fondi Shqiptar i Zhvillimit ka hapur tenderin për zbatimin e projektit që synon të synon të riaktivizojë polin social dhe ekonomik të Shkodrës, duke përfituar nga kushtet natyrore të vendit dhe duke lidhur e promovuar tre aktivitetet kryesore strategjike, që janë: Rekreacioni, turizmi dhe ekonomia.
Sipas dokumenteve të tenderit, projekti ka gjashtë objektiva kryesore. Krijimi i një zone neutrale ekologjike që lidh marrëdhëniet midis liqenit dhe qytetit, krijimi i parkut publik më të madh të Shkodrës, si dhe krijimi i një rrjeti të rrugeve për këmbësorë dhe biçikleta që lidh natyrën, monumentet dhe rrugët piktoreske janë disa nga objektivët. Gjithashtu, synohet krijimi i një pike takimi ikonë për ngjarjet publike, ndërtimi i një muzeu të ri, si dhe rindërtimi i portit të Shkodrës për zgjerimin e polit turistik me një rrjet lumor përgjatë ujit.
Kompanitë e interesuara kanë vetëm 2 javë kohë për dorëzimin e dokumenteve për të marrë pjesë në tender, duke qenë se afati i fundit është data 8 nëntor. Ndërkohë që, i gjithë projekti pritet të finalizohet brenda 16 muajsh nga nënshkrimi i kontratës, por gjithsesi referuar grafikut të punimeve ato nuk përfshijnë arritjen e gjithë objektivëve, duke sugjeruar se një tender i dytë do të hapet në vijim, në përmbushje të të gjithë projektit.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
