Mesatarisht 2 mijë biznese mbyllen në Kosovë brenda një viti ka treguar Aleanca Kosovare e Bizneseve, por sipas saj janë rreth 8 mijë biznese të tjera të reja që hapen po në këtë periudhë kohore.
Shuarja e aktivitetit të bizneseve në Kosovë, kohët e fundit është në rritje. Sipas një hulumtimi nga Aleanca Kosovare e Bizneseve, brenda një viti mesatarisht mbyllen rreth 2 mijë biznese në Kosovë.
Kryetari i Aleancës Kosovare të Bizneseve, Agim Shahini, përveç një numri arsyesh pse bizneset mbyllen ka radhitur edhe mungesën e fuqisë punëtore.
“Nga viti 2002 e këndej mesatarisht bizneset në Kosovë mbyllen rreth 2 mijë e hapen mbi 8 mijë. Nëse analizojmë shkaqet e mbylljes janë më të ndryshmet.
Nga ajo pse humbë fuqinë në treg, pse nuk ka mbështetje, pse interesi bankar është i lartë dhe infrastruktura është tepër e shtrenjtë, duke përfshirë këtu qiranë, energjinë elektrike. Ngarkesat për biznes e fuqia e konkurrencës janë arsye që po mbyllen bizneset e së fundi edhe fuqia punëtore”.
Kurse, kryetari i Lidhjes së Bizneseve të Kosovës, Besart Dreshaj ka treguar se faktorë për mbylljen e bizneseve është gjendja e rëndë ekonomike por edhe një mjedis i vështirë i të bërit biznes.
“Për fat të keq kemi një numër të madh të bizneseve të cilat po mbyllen në Kosovë. Është shqetësues ky numër sepse po jep një mesazh që këtu ka shumë faktor që ndikojnë në gjendjen e bizneseve.
Një ndër ta është mesazh i qartë që në Kosovë, gjendja ekonomike dhe të bërit biznes është në gjendje jo të mirë. Ne si Lidhje e Bizneseve kemi kërkuar nga Qeveria vazhdimisht që të ketë ndryshime politike fiskale sepse bizneset janë në gjendje jashtëzakonisht të keqe”.
Sipas Agjencisë së Regjistrimit të Bizneseve në Kosovë, nga marsi i vitit 2021 deri në shtator të këtij viti në Kosovë janë regjistruar mbi 40 mijë biznese. Ndërsa kërkesat për çregjistrimin e bizneseve numërohen mbi 5 mijë, ose rreth 8 për qind.
Postimi ” AKB: Rreth 2 mijë biznese mbyllen në Kosovë brenda vitit ” eshte marre nga Revista Monitor.
