Operatori kombëtar i sistemit të transmetimit “Albgaz” është certifikuar sipas modelit të ndarjes së pronësisë, por të gjitha kushtet e vendosura në vendimin e certifikimit janë ende të paplotësuara”. Konstatimi vjen nga Sekretariati i Komunitetit të Energjisë, në raportin e implementimit të reformave, të publikuar në muajin dhjetor të vitit që sapo lamë pas. Sipas raportit, një nga kushtet e paplotësuar është transferimi i plotë i kompetencave mbi vendimet për investime në ministrinë që kontrollon kompaninë shtetërore “Albgaz”.
Gjithsesi, raporti vlerëson se ndonëse vendi ynë nuk ka një treg kombëtar të gazit natyror, legjislacionit dytësor që rregullon furnizimin e konsumatorëve është miratuar. Ndërkaq, duke marrë në konsideratë këtë situatë Sekretariati i Komuniteti të Energjisë kërkon zbatimin e kushteve të certifikimit për Albgaz, si dhe përshpejtimin e përpjekjeve për ta bërë atë një operator operacional të sistemit të transmetimit.
Po ashtu, Shqipëria duhet të ndërmarrë veprime koherente dhe të targetuara për të krijuar një treg funksional gazi për të shfrytëzuar potencialin e infrastrukturës prezente në vend dhe për të krijuar një treg bazë për planet e zhvillimit të infrastrukturës. Qeveria shqiptare ka shprehur ambiciet për zhvillime konkrete të tregut të gazit gjatë vitit 2023, teksa të dhënat tregojnë se Masterplani për zhvillimin e sektorit, i miratuar në nëntor të vitit 2016 është ende në letër.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
