Banka e Anglisë i mbajti normat në 3.75%, me inflacionin ende mbi objektivin 2% dhe me të dhënat e fillimit të vitit 2026, që lënë të kuptohet se ekonomia e ka nisur vitin më fort sesa pritej, duke e ndërlikuar mundësinë për ulje në afat të shkurtër.
Banka e Anglisë e la të pandryshuar normën kryesore të interesit në 3.75% të enjten, ndërsa inflacioni mbetet mbi objektiv dhe rritja ekonomike po jep shenja se po përshpejtohet.
Banka qendrore, e cila përcakton normat e interesit për të gjithë Mbretërinë e Bashkuar, i ka ulur në mënyrë të qëndrueshme normat e interesit gjatë 18 muajve të fundit, çdo tre muaj.
“Vendimi i pritshëm për ta mbajtur normën bazë në 3.75% u jep pak frymëmarrje kursimtarëve, por do të jetë zhgënjyes për huamarrësit që shpresonin lehtësim,” tha Karen Barrett, themeluese e Unbiased, një platformë britanike këshillimi financiar.
Herën e fundit, banka e uli normën kyçe në dhjetor me çerek pike përqindjeje dhe sinjalizoi se ulje të mëtejshme ka gjasa të ndodhin këtë vit.
Që atëherë, një seri treguesish ekonomikë kanë treguar se ekonomia britanike e ka nisur vitin më fort sesa pritej, gjë që ka potencialin të ushtrojë presion rritës mbi inflacionin.
Inflacioni, edhe pse në trend rënës gjatë vitit të fundit apo më shumë, mbetet mbi objektivin 2% të Bankës së Anglisë, në nivelin 3.4%.
“Të dhënat e vitit 2026 sugjerojnë kërkesë më të fortë dhe inflacion më ‘rritës’ sesa kishim pritur,” tha Andrew Wishart, ekonomist i lartë për Mbretërinë e Bashkuar në Berenberg Bank.
Ekonomistët thanë se të dhënat e ardhshme do të jenë kyçe për të përcaktuar se kur banka qendrore do t’i ulë sërish normat e interesit.
Normat më të ulëta të interesit ndihmojnë në nxitjen e rritjes ekonomike duke ulur kostot e huamarrjes, çka mund të çojë në rritje shpenzimesh nga konsumatorët dhe të shtojë investimet nga bizneset. Por kjo mund të nxisë gjithashtu rritje më të larta çmimesh.
Bankierët qendrorë duhet të peshojnë këto forca konkurruese, duke u përpjekur të parandalojnë që inflacioni të gërryejë vlerën e të ardhurave dhe kursimeve, pa vendosur një frenë të panevojshme mbi rritjen ekonomike.
Qeveria laburiste e Britanisë ka humbur mbështetje të konsiderueshme që prej fitores në zgjedhjet e përgjithshme të vitit 2024, pjesërisht për shkak të faktorëve ekonomikë. Ajo do të shpresojë që inflacioni të bjerë ndjeshëm këtë vit, duke i hapur rrugë bankës qendrore të ulë më tej kostot e huamarrjes. / Euronews
Postimi ” Banka e Anglisë i mban normat të pandryshuara në 3.75%, inflacioni mbetet mbi objektivin ” eshte marre nga Revista Monitor.
