Banka qendrore e Japonisë ka rritur koston e huamarrjes në nivelin më të lartë në 17 vjet, pasi rritja e çmimeve të konsumit u përshpejtua në dhjetor.
Lëvizja e Bankës së Japonisë (BOJ) për të rritur normën e saj afatshkurtër të politikës në, “rreth 0.5 %” vjen vetëm disa orë pasi të dhënat më të fundit ekonomike treguan se çmimet u rritën muajin e kaluar me ritmin më të shpejtë në 16 muaj.
Rritja e fundit e normës së interesit të BOJ në korrik, së bashku me një raport të dobët të punësimit nga SHBA, i kapi investitorët në mbarë botën në befasi, gjë që shkaktoi një shitje të madhe aksionesh në tregjet financiare.
Guvernatori i bankës, Kazuo Ueda, sinjalizoi paraprakisht këtë rritje të fundit të normës në një përpjekje për të shmangur një goditje tjetër në treg.
Sipas shifrave zyrtare të publikuara të premten, çmimet bazë të konsumit në Japoni u rritën me 3% në dhjetor.
Vendimi shënon rritjen e parë të normës së BOJ, që nga korriku dhe erdhi vetëm disa ditë pasi Donald Trump u kthye në Shtëpinë e Bardhë.
Gjatë fushatës zgjedhore Trump kërcënoi se do të vendoste tarifa për të gjitha importet në SHBA, të cilat mund të kenë një ndikim në vendet eksportuese si Japonia.
Duke rritur normat tani, banka do të ketë më shumë hapësirë për të ulur normat në të ardhmen, nëse ka nevojë për të nxitur ekonominë.
Lëvizja nxjerr në pah planet e bankës qendrore për të rritur në mënyrë të qëndrueshme normat në rreth 1% – një nivel që nuk shihet si as nxitës apo ngadalësues i ekonomisë.
BOJ sinjalizoi se normat e interesit do të vazhdojnë të rriten nga nivelet ultra të ulëta.
Neil Newman, kreu i strategjisë në Astris Advisory Japan tha: “Normat do të vazhdojnë të rriten me rritjen e pagave, inflacioni mbetet mbi 2% dhe ka rritje në ekonomi.”
“Ne kërkojmë një rritje tjetër prej 25 pikësh në gjashtë muaj,” tha Stefan Angrick, ekonomist japonez në Moody’s Analytics.
Vitin e kaluar, BOJ rriti koston e huamarrjes për herë të parë që nga viti 2007, pasi normat ishin mbajtur të ulëta për vite me radhë, ndërsa vendi po luftonte me rritjen tejet të ulët të çmimeve.
Kjo rritje nënkuptonte se nuk kishte më asnjë vend me norma interesi negative.
Kur normat negative janë në fuqi, njerëzit duhet të paguajnë për të depozituar para në një bankë. Ato janë përdorur nga disa vende, si një mënyrë për të inkurajuar njerëzit të shpenzojnë paratë e tyre në vend që t’i vendosin në bankë. / BBC
Postimi ” Banka e Japonisë rrit normat në nivelin më të lartë në 17 vjet ” eshte marre nga Revista Monitor.
