Përplasja mes administratës Trump dhe Bashkimit Europian po thellohet, ndërsa gjobat e vendosura nga Brukseli ndaj gjigantëve amerikanë të teknologjisë kanë kaluar 6 miliardë euro në dy vitet e fundit, ose më shumë se 7 miliardë dollarë. Sipas të dhënave të Komisionit Europian, kompanitë amerikane të Big Tech, përfshirë Google, Meta dhe Apple, janë përballur me sanksione të shumta për abuzim me pozitën dominuese në treg, shkelje të rregullave të mbrojtjes së të dhënave dhe praktika të padrejta konkurruese.
Vetëm gjatë kësaj periudhe, totali i penaliteteve ka kaluar 6 miliardë euro, duke reflektuar qasjen gjithnjë e më agresive të Europës ndaj rregullimit të tregjeve digjitale. Zyrtarët europianë kanë theksuar se çdo kompani që operon në territorin e BE-së duhet t’u bindet rregullave europiane dhe të mbajë përgjegjësi ndaj qytetarëve të unionit.
Që nga viti 2024 janë vendosur gjashtë gjoba:
Mars 2024: Apple u gjobit me 1.84 miliardë euro sipas rregullave antitrust për abuzim me pozitën dominuese në tregun e shpërndarjes së aplikacioneve të transmetimit të muzikës.
Nëntor 2024: Meta u gjobit me 797 milionë euro sipas rregullave antitrust për praktika që favorizonin Facebook Marketplace.
Shtator 2025: Google u gjobit me 2.9 miliardë euro sipas rregullave antitrust për praktika antikonkurruese në biznesin e saj të teknologjisë së reklamave.
Prill 2025: Apple u gjobit me 500 milionë euro për mosrespektim të detyrimeve “anti steering”. Meta u gjobit me 200 milionë euro sipas Aktit të Tregjeve Digjitale, pasi kërkonte që përdoruesit të pranonin ndarjen e të dhënave me kompaninë ose të paguanin për një shërbim pa reklama.
Dhjetor 2025: X u gjobit me 120 milionë euro sipas Aktit të Shërbimeve Digjitale për shkelje të detyrimeve të transparencës.
Nga ana tjetër, zyrtarë të administratës Trump kanë shprehur pakënaqësi në rritje ndaj kësaj vale rregullatore, duke argumentuar se kompanitë amerikane po targetohen në mënyrë disproporcionale, pavarësisht rolit të tyre dominues në ekonominë digjitale globale. Kjo po e shndërron çështjen e gjobave ndaj Big Tech në një tjetër front tensioni mes SHBA-së dhe Europës, krahas mosmarrëveshjeve tregtare dhe tarifore.
Në tregje, reagimi i investitorëve ka qenë relativisht i kufizuar. Aksionet e Alphabet pësuan një lëvizje minimale negative, Meta shënoi një rritje të lehtë, ndërsa Apple u dobësua modestisht, një sinjal se tregjet i kanë të përfshira tashmë në çmime rreziqet rregullatore që vijnë nga Europa.
Ky presion pritet të vazhdojë, pasi Bashkimi Europian po forcon zbatimin e kuadrit të Digital Markets Act dhe rregullave të tjera të konkurrencës, duke e vendosur sektorin teknologjik nën mbikëqyrjen më të fortë rregullatore në botë./ CNBC
Postimi ” BE godet Big Tech, mbi 6 miliardë euro gjoba për Apple, Google, Meta dhe X ” eshte marre nga Revista Monitor.
