Bashkimi Europian do të propozojë rregulla të reja muajin e ardhshëm për të bërë më të lehtë listimin e kompanive, në mënyrë që t’u japë kreditorëve më shumë parashikueshmëri për falimentimet e tyre, por dhe për të tërhequr më shumë derivate në euro nga Londra.
Shefja e shërbimeve financiare të Bashkimit Europuan, Mairead McGuinness, u shpreh se është regjistruar një përparim pozitiv në ndërtimin e unionit të tregjeve të kapitalit të BE-së por duhej bërë më shumë për të lehtësuar varësinë nga bankat për financimin e kompanive dhe ekonomisë.
McGuinness tha se vitin e ardhshëm do të propozonte thjeshtimin e sistemit të mbajtjes së tatimit për investimet që sipërmarrësit kanë jashtë shtetit të tyre në bllok. BE-ja po vëzhgon nga afër hapat që po ndërmerren nga Britania për të forcuar konkurrencën e sektorit të saj financiar, tashmë të shkëputur nga blloku. Ajo theksoi se kur Britania e Madhe ishte pjesë e Bashkimit Europian, ky i fundit kishte një qendër shumë të fortë financiare, por kjo ka ndryshuar dhe fokusi i punës po ndryshon për shkak të kësaj.
Sipas një raporti të publikuar nga unioni i tregjeve të kapitalit, Europa renditet pas Shteteve të Bashkuara të Amerikës për sa i përket krijimit të një rezerve të thellë kapitalesh për investitorët, pavarësisht nga masat e shumta legjislative të marra nga BE vitet e fundit.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
