Besimi i bizneseve në Gjermani u përkeqësua më shumë se sa pritshmëritë në dhjetor, i rënduar nga vlerësimi pesimist i kompanive për muajt e ardhshëm, mes pasigurisë gjeopolitike dhe një rënie industriale në ekonominë më të madhe të Europës.
Instituti Ifo tha se indeksi i tij i klimës së biznesit, tregues i situatës dhe pritshmërive të bizneseve, ra në 84.7 në dhjetor, nga 85.6 i rishikuar paksa në rënie muajin e kaluar.
“Dobësia në ekonominë gjermane është bërë kronike,” tha presidenti i Ifo, Clemens Fuest.
Ndërsa sondazhi i Ifo pasqyroi dyshime të thella midis kompanive, një sondazh i veçantë i publikuar nga instituti ZEW tregoi se investitorët ishin shumë më optimistë, duke i mbështetur kryesisht shpresat e tyre në një ndryshim në qeveri, pas zgjedhjeve të ardhshme të 23 shkurtit.
Sondazhi i Ifo me rreth 9,000 menaxherë, gjeti një përmirësim në vlerësimin e kompanive për kushtet aktuale, por indeksi i pritshmërive ra në 84.4 në dhjetor nga 87.0 në nëntor. Ekonomistët e anketuar nga Reuters kishin parashikuar një lexim 87.5.
Rizgjedhja e Donald Trump si president i SHBA-së dhe lufta në Ukrainë, shoqëruar me një qasje ‘prit-dhe-shiko’ për investimet përpara zgjedhjeve të parakohshme, kanë shtuar pasigurinë në një kohë kur ekonomia e Gjermanisë ndodhet tashmë në vështirësi.
Pas pothuajse dy viteve tkurrje ekonomike, viti i ardhshëm parashikohet të sjellë sfida të mëtejshme, pasi industria e Gjermanisë është në stanjacion, me emra të mëdhenj si Volksëagen, që synon të zvogëlojë prodhimin ndërsa besimi i konsumatorëve është në rënie për shkak të frikës nga shkurtimet e vendeve të punës.
Investitorët më optimistë
Kryeekonomisti i Commerzbank Joerg Kraemer fajësoi problemet e rrënjosura thellë në industrinë gjermane për situatën pesimist të krijuar.
“Për rrjedhojë, rritja ekonike nxitur nga rënia e normave të interesit të BQE-së nuk ka gjasa të ketë një ndikim pozitiv në produktin e brendshëm bruto,” tha Kraemer, duke parashikuar vetëm rritje të vogël në 2025 prej 0.2%.
Cyrus de la Rubia i Hamburg Commercial Bank tha se përkeqësimi i perspektivës së kompanive, ndoshta do të nënkuptonte hezitim afatshkurtër për të investuar, veçanërisht ndërsa presin që partitë politike të Gjermanisë të paraqesin planet e tyre të fushatës zgjedhore.
“Nuk pritet asnjë përmirësim thelbësor në situatën ekonomike në gjysmën e parë të vitit,” tha de la Rubia.
Megjithatë, sondazhi i dhjetorit i institutit ZEW tregoi se investitorët parashikojnë një përmirësim të mëtejshëm.
Indeksi i besimit ekonomik u rrit fuqishëm në 15.7 pikë në dhjetor nga 7.4 pikë, duke mposhtur pritshmëritë për një rënie.
Ndërsa zgjedhjet e Gjermanisë mund të paraqesin pasiguri në afat të shkurtër, ZEW i përshkroi ato si një zhvillim pozitiv në terma afatgjatë, duke dhënë shpresa se një qeveri e re do të gjente mënyra për të rregulluar ekonominë.
“Me zgjedhjet e parakohshme përpara në Gjermani dhe pritshmëritë për një politikë ekonomike, që inkurajon investimet private, si dhe perspektivën e uljes së mëtejshme të normave të interesit, perspektiva ekonomike po përmirësohet,” tha presidenti i ZEW, Achim Wambach. / Reuters
Postimi ” Besimi i bizneseve në Gjermani bie në dhjetor, ekonomia në dobësi “kronike” ” eshte marre nga Revista Monitor.
