Pas një rritje të vazhdueshme gjatë muajve të fundit, Besimi në ekonomi ka shënuar rënie të dukshme për muajin korrik. Sipas vrojtimit të përmuajshëm të Bankës së Shqipërisë, Treguesi i ndjesisë ekonomike ra me 6.5 pikë, duke shënuar një pikë kthese në trendin rritës të tetë muajve të fundit. Megjithatë, nënvizon Banka e Shqipërisë, niveli i tij 112.4 qëndron ndjeshëm mbi mesataren historike, ose +12.4 pikë.
Treguesi i besimit të industrisë u tkurr me 4.4 pikë përqindje në muajin korrik, pasi kishte shënuar rritje që nga muaji shkurt. Zhvillimi i këtë muaji u ndikua nga rënia e vlerësimeve të bizneseve si për prodhimin aktual, ashtu edhe për kontratat porositëse. Pritjet e bizneseve të industrisë për prodhimin në të ardhmen kanë regjistruar rritje të lehtë në korrik, ndërsa pritjet për punësimin dhe çmimet që do të vendosin në të ardhmen janë në rënie.
Treguesi i besimit në shërbime pësoi rënie për të dytin muaj rresht, me 10.4 pikë përqindje. Megjithatë, niveli i tij vijon të qëndrojë 16.4 pikë përqindje mbi mesataren afatgjatë. Kontributin kryesor në rënie e dhanë vlerësimet më pak optimiste të bizneseve për ecurinë aktuale të aktivitetit të tyre. Edhe komponenti i dytë, niveli i kërkesës, është vlerësuar me rënie këtë muaj. Gjithashtu, niveli i punësimit dhe pritjet për të në të ardhmen vlerësohen në rënie nga bizneset e ndërtimit. Pritjet e tyre për ecurinë e çmimeve në të ardhmen janë rritur. Në rënie janë edhe treguesit e sektorëve të tjerë, përvecc sektorit të tregtisë, i cili regjistroi rritje me 1.6 pikë përqindje në muajin korrik. Bizneset e këtij sekori janë më optimistë për ecurinë e tij në vijim.
Ndërkaq, rënie për muajin korrik ka shënuar edhe besimi konsumator. Ai regjistroi rënie me 1.9 pikë përqindje në korrik, duke iu rikthyer nivelit të mesatares historike. Rënia këtë muaj reflektoi rënien në të gjithë komponentët përbërës: blerjet në shuma të mëdha, pritjet për situatën financiare dhe situatën e përgjithshme ekonomike në të ardhmen.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
