Ola Mitre /
Mungesa e reshjeve të shiut nuk ka favorizuar prodhimin e energjisë elektrike për periudhën janar – gusht të këtij viti. Sipas të dhënave nga Enti Rregullator i Energjisë gjatë 8-mujorit u prodhuan rreth 5.4 mln mWh, duke shënuar rënie në raport me një vit më parë, ku për të njëjtën periudhë u gjenerua rreth 6.2 mln mWh energji.
Të njëjtat të dhëna tregojnë se prodhimi u dominua nga hidorecentralet e Kaskadës së Drinit me 55% të energjisë totale. Sipas të dhënave nga ERE, pjesë e sasisë së energjisë së gjeneruar nga Korporata Elektroenergjetike Shqiptare ëhstë edhe energjia e prodhuar nga centrali diellor në Karavasta, sipas kontratës së lidhur mes palëve, si dhe impianti diellor i Qyrsaqit.
Ndërkaq, pjesa tjetër e impinateve diellore ku përfshihen prodhuesit e pavarur, ata në treg të lirë, si dhe fotovoltaikët e lidhur me rrjetin e OSSH, kanë gjeneruar në total 131 739 mWh energji, një sasi më e lartë se 8- mujori i vitit 2023, kur këto impinate prodhuan 44 885 mWh energji.
Konsumi total i energjisë për 8 – mujorin arriti në rreth 5.47 mln mWh energji, një nivel thuajse i njëjtë me atë të konsumuar në periudhën janar- gusht të vitit të kaluar, ku konsumi u regjistrua në 5.31 mln mWh.
Niveli i humbjeve në rrjetin e shpërndarjes për 8 – mujorin u regjistrua në 17.56%, duke shënuar përmirësim në raport me të njëjtën periudhë të vitit të kaluar, ku humbjet përllogariteshin në 19.15%. Sa i takon nivelit të arkëtimeve, ai fiksohet në 99.3% ndërkohë që për të njëjtën periudhë të vitit të kaluar ky tregues ishte 97.4% e faturave të gjeneruara nga OSHEE.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
