Rritjet e njëpasnjëshme të normës bazë të interesit kanë rritur me më shumë se dyfish pjesëmarrjen e individëve në tregun me pakicë të letrave me vlerë të Qeverisë. Për muajt janar mars të vitit 2023, Autoriteti i Mbikqyrjes Financiare raporton në total 5,895 transaksione të kryera nga individët në tregun primar të titujve të qeverisë, me një rritje prej rreth 113% krahasuar me të njëjtën periudhë të një viti më parë, kur totali i tyre ishte 2,762. Një rritje e tillë e numrit të transaksioneve është shoqëruar edhe me rritjen e volumit të parave të investuara në bono e obligacione të Qeverisë nga qytetarët.
Individët blenë në tregun primar në tre muajt e parë të vitit më 15,1 miliardë lekë lektra me vlerë të qeverisë, ose afërisht 150 milionë dollarë. Rritja është 67.8% krahasuar me tre muajt e parë të vitit të shkuar, kur totali i investimeve nga individët ishte 8.9 miliardë lekë, apo afërisht 89 milionë dollarë.
Ndërkaq, vëllimi i tregut sekondar të titujve të Qeverisë për periudhën janar-mars 2023, u dominua në masën 71.31% nga transaksione në instrumente afatshkurtër (bono thesari) dhe 28.69% nga transaksionet në instrumente afatgjatë (obligacione). Parë nga këndvështrimi i numrit të transaksioneve, 88.18% e të gjitha transaksioneve të tregut sekondar të titujve të Qeverisë, i takojnë transaksioneve të kryera në bono thesari.
Të dhënat statistikore të tregut me pakicë të titujve të Qeverisë për periudhën janar-mars 2023, flasin për një dominim të transaksioneve “Blerje në tregun primar” dhe “Shlyerje e vlerës nominale në maturim” përkatësisht me 61.84% dhe 26.33% kundrejt vëllimit të përgjithshëm. Pjesëmarrja në tregun sekondar të titujve të Qeverisë, për periudhën janar-mars 2023 dominohet nga investitorët individualë, të cilët kryejnë 99.22% të të gjitha transaksioneve në këtë treg.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
