Bullgaria është shumë afër përmbushjes së kriterit të inflacionit për anëtarësimin në Eurozonë, sipas një analize të Bankës së Bashkuar Bullgare (UBB). Kryeekonomisti i UBB-së, Dr. Emil Kalchev, i cili analizoi të dhënat e inflacionit për nëntorin, thotë se vendi mund të përmbushë kushtin e qëndrueshmërisë së çmimeve në pak muaj.
Analiza vë në dukje se në nëntor, inflacioni i konsumit (sipas metodologjisë kombëtare), u rrit lehtësisht në nivelin 2.1%, krahasuar me 1.8% në tetor 2024. Treguesi i Harmonizuar i Çmimeve të Konsumit për muajin nëntor mbeti në nivelin e tetorit (2%), ndërsa inflacioni bazë (duke përjashtuar ushqimet dhe karburantet) ra paksa nga 3% në 2.9%. “Nëse vazhdon kjo prirje, Bullgaria do të përmbushë kushtin e qëndrueshmërisë së çmimeve për t’u bashkuar me Eurozonën në fillim të 2025-s”, parashikoi Kalchev. Sipas ekonomistit, inflacioni në Eurozonë është normalizuar dhe rritja e theksuar e çmimeve të banesave është frenuar, falë politikës monetare të Bankës Qendrore Europiane.
“Inflacioni në Eurozonë po normalizohet dhe rritja e theksuar e çmimeve të banesave është frenuar”, theksoi Kalchev, duke shtuar se për pesë tremujorë, u regjistruan rënie dhe vetëm në tremujorin e dytë dhe të tretë të vitit 2024, u regjistrua një rritje vjetore prej përkatësisht 1.3% dhe 2.6%. Sipas analizës, në tremujorin e tretë të vitit 2024 (sipas të dhënave më të fundit), çmimet e banesave në Bullgari u rritën me 16,5% krahasuar me të njëjtën periudhë të vitit 2023, që është shumë më shpejt se sa rritja e inflacionit në vend dhe rritja e çmimit të banesave në BE dhe Eurozonë.
“Politika monetare e BQE-së ka pasur shumë pak ndikim në Bullgari”, tha Kalchev, duke shtuar se Banka Kombëtare Bullgare zbatoi një sërë masash për të frenuar çmimet e pronave. “Të përqendruar në kredinë hipotekore, rregullat kufizuese kanë qenë në fuqi që nga tetori 2024, por efekti i tyre nuk është matur ende statistikisht”, vëren Emil Kalchev.
Politika fiskale ka ndjekur një prirje ciklike. Pagat e sektorit publik u rritën me gati 9% në vitin 2022 në bazë vjetore, më pas me 14% në vitin 2023 dhe 17% në vitin 2024, thuhet në analizë.
“Këto kanë rritur dinamikën e përgjithshme të pagave në vend, duke nxitur blerjen e pronave”, tha Kalchev, duke shtuar se “blerësit e pronave po mbështeten në kursimet e tyre dhe po përfitojnë nga interesi shumë i ulët dhe hipotekat e përballueshme, në një treg të dobët kapitali”. Hyrja e mundshme në Eurozonë po nxit edhe më shumë blerjet e banesave. “Kështu, ne e kemi rritur parashikimin e çmimit të banesave për vitin 2024, nga 12.2%, në 15.1%”.
Analiza tregoi gjithashtu se industria shënoi një rritje reale prej 1.2% në shtator 2024 (krahasuar me shtatorin 2023), pas së cilës raportoi një prodhim të barabartë me nivelin e tetorit 2023, pra një rritje prej 0.0%.
“Duke pasur parasysh recesionin në Gjermani dhe rritjen më të dobët ekonomike në Rumani, të cilat janë dy tregjet më të rëndësishme për eksportet bullgare, rezultati në tetor është mjaft i kënaqshëm” tha kryeekonomisti i UBB-së.
Sektori i ndërtimit u rrit me 8.7% në muajin tetor, i nxitur kryesisht nga projektet publike, por i mbështetur edhe nga ndërtimet e banesave.
Treguesi i përgjithshëm i klimës së biznesit u rrit nga 17% në nëntor, në 18.7% në dhjetor. Pritshmëritë e industrisë u rritën nga 15.8% dhe 17.7%. Në tregtinë me pakicë, ato gjithashtu u rritën nga 23.7% në 29.4%. Shërbimet gjithashtu shënuan një rritje të lehtë, ndërsa ndërtimi shënoi një rënie të lehtë të pritshmërive, nga nëntori në dhjetor, thuhet në analizë.
Postimi ” Bullgaria, pranë plotësimit të kriterit të inflacionit për në Eurozonë ” eshte marre nga Revista Monitor.
