Numri i anëtarëve të Bursës Shqiptare të Energjisë ka vijuar të rritet për të dyja zonat e ofertimit Shqipëri dhe Kosovë ku më aktive së fundmi anëtarësimet ka qenë për këtë të dytën.
Kjo lidhet me faktin që funksionimi i tregut të ditës në avancë për Kosovën u bë vetëm në mars të këtij viti ndërsa nisja e punës së bursës në Shqipëri ishte në prill të vitit të shkuar. Kjo ka bërë që kompanitë shqiptare që tashmë ishin anëtarë në zonën e ofertimit në vendit tonë të anëtarësohen për të qenë aktive duke ofertuar edhe në Kosovë.
Sipas shifrave për të dyja tregjet janë në total 31 anëtare. Nga këto 19 anëtarë janë aktivë për zonën e ofertimit në Shqipëri ndërsa 12 janë të Kosovës gjithmonë për tregun e ditës në avanacë. Një numër në rritje ka edhe numri i anëtarëve të bursës që janë aktivë në ankandet brenda të njëjtës ditë.
Ky numër anëtaresh për të dy tregjet është në 10 aktualisht. Ajo që bie në sy është një diversifikim i numrit të anëtarëve që janë pjesë e bursës ku përveç furnizuesve dhe prodhuesve të energjisë nga hidro dhe që kanë një licencë aktive tregtimi tashmë ka edhe subjekte që kanë në thelb prodhimin e energjisë nga impiante fotovoltaikë dhe që përveç licencës së prodhimit kanë edhe atë të tregtimit.
Funksionalkizimi i bursës për Shqipëri-Kosovë a bërë që të ketë edhe rritje të numrit të anëtarëve të klerimit apo kanaleve që përdoren për pagesa. Aktualisht janë të paktën katër anëtarë klerimi dy prej të cilëve në Shqipëri dhe dy në Kosovë.
Bursa Shqiptare e Energjisë nisi operimin e saj në 12 prill të vitit të shkuar fillimisht vetëm për Shqipërinë dhe më pas këtë vit edhe me Kosovën. Aktorë të tregut por edhe Sekretariati i Energjisë kërkonin prej vitesh ngritjen e një platforme të tillë si një mekanizëm për rritjen e transparencës në treg por edhe rritjen e sigurisë energjetike.
Kjo u bë edhe më evidente gjatë vitit 2022 kur kriza e energjisë arriti kulmin e saj dhe kërcënimi real për vendet u bë sigurimi i energjisë dhe çmimet arritën nivele rekord./N.Maho
Postimi ” Bursa e energjisë, tregtuesit në Shqipëri arrijnë në 19, zgjerohet edhe Kosova ” eshte marre nga Revista Monitor.
