Çmimi i energjisë së siguruar nga Furnizuesi i Mundësisë së Fundit (FMF) gjatë 2024-s ishte 25.6% më i ulët se një vit më parë.
Kjo ka reflektuar një qetësim të mëtejshëm të situatës që la post-kriza që nisi në 2021 dhe kulmoi në vitin 2022 duke e çuar çmimin e energjisë në nivele rekord prej 1037 euro/MWh në ditë të caktuara. Muaji me çmimin më të lirë të energjisë në tregun e lirë shënoi prilli 2024 ku një KWh energji kushtoi 6.19 lekë/KWh.
“Vlera më e ulët e çmimit të blerjes së energjisë elektrike për vitin 2024 rezultoi në muajin prill, ku 1 kWh është blerë me 6.19 lekë/kWh, ose shprehur ndryshe 52% më e ulët se çmimi mesatar i ponderuar i blerjes së energjisë në muajin prill 2023.
Nga krahasimi i mesatares vjetore të vitit 2023 (15.17 lekë/kWh) me mesataren vjetore të vitit 2024 (11.28 lekë/kWh), çmimi i energjisë elektrike të blerë në treg të lirë për mbulimin e kërkesës së kësaj kategorie klientësh FMF, ka pësuar një rënie në masën 25.62%” thuhet në raportin vjetor të Entit Rregullator të Energjisë.
Furnizuesi i Mundësisë së Fundit është pjesë e OSHEE Group dhe kjo hallkë siguron energji për subjektet që kanë detyrimin e daljes në tregun e lirë por për dy vite atyre ju ofrohet sigurimi i energjisë në këtë formë nëse nuk kanë gjetur një furnizues privat. Aktualisht në tregun e lirë janë bizneset në tension 35 kv, ato në 20 kv dhe së fundmi edhe ato në 10 kilovolt që dolën këtë janar.
Çmimi i blerjes së energjisë në treg të lirë nuk është ai final me të cilin FMF furnizon subjektet. Enti Rregullator i Energjisë sipas një metodologjie përllogarit çmimin final që përfshin edhe kostot e shpërndarjes, një fitim minimal, shpenzime operative dhe transmetimin.
ERE në prill të vitit të shkuar vendosi çmimin e shitjes së energjisë elektrike për vitin 2024 për klientët e FMF të lidhur në nivelin e tensionit 20/10/6 kV, prej 18.26 lekë/kWh. Referuar raporteve periodike të ERE-s për vitin 2024, rezulton se sasia e energjisë së konsumuar nga klientët e lidhur në nivelet e tensionit 20/10/6 kV për këtë vit është 590 GWh me një vlerë të faturuar prej afro 9.9 miliardë lekë apo 98 milionë euro./ N.Maho
Postimi ” Çmimi i energjisë në tregun e lirë ra me 25.6% në vitin 2024 ” eshte marre nga Revista Monitor.
