Enti Rregullator i Energjisë ka dhënë një sërë licencash për prodhim energjie gjatë 6-mujorit të parë të këtij viti, teksa fuqia totale e instaluar arrin në 239 MW. Sipas të dhënave zyrtare, sasia prej 110 MW i takon 2 termocentraleve lundrues, të marrë me qira nga Korporata Elektroenergjetike Shqiptare, që janë pozicionuar në Triport të Vlorës. Licenca për këto 2 impiante është dhënë në muajin mars 2023.
Ndërkaq, pas licencave për energji fosile, renditen burimet gjeneruese të energjisë nga dielli. Në total, për periudhën 6 – mujore ERE ka licencuar 5 subjekte, teksa fuqia totale e instaluar është 76 MW. Ndërkaq, nuk kanë munguar licencat e reja për hidrocentralet.
Për periudhën janar – qershor kanë marrë miratimin 3 subjekte, për 10 hidrocentrale të parashikuar. Fuqia e instaluar e këtyre impianteve arrin në 53 MW.
Ndërkaq, sa i takon prodhimit të energjisë nga era, për këtë periudhë të vitit nuk është dhënë asnjë licencë e re, duke bërë që lista e të licencuarve në prodhimin e energjisë nga impiantet eolike të kufizohet në vetëm 2 subjekte, për projekte me fuqi të instaluar 222 MW. Këto licencime të reja vijnë pas atyre të viti 2022, që ndryshe nga 6 – mujori 2023 shënoi zhvillime në drejtim të licencave të dhëna për prodhimin e energjisë elektrike nga burime të rinovueshme.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
