Komisioni Europian ka miratuar një shumë prej 922 milionë eurosh për të mbështetur një program reformash dhe projektesh në Shqipëri që i shërbejnë rritjes ekonomike të vendit për periudhën 2024 – 2027, në kuadër të planit të rritjes për Ballkanin Perëndimor.
Por përmbushja e kushteve për tërheqjen e fondeve të paktën nga ana e Shqipërisë duket e vështirë.
Për vitin 2025, qeveria e Shqipërisë ka planifikuar të tërheqë një shumë prej 4.5 miliardë lekë (45 mln euro) financime mbi bazë projektesh nga Plani i Rritjes me BE-në, thuhet në dokumentin e fundit të reformave prioritare 2026 -2028 që u miratua pak ditë më parë.
Për vitin e 2024 nuk pati disbursime fondesh për shkak se agjenda e reformave për të cilat do të alokohet mbështetja është miratuar vetëm në fund të vitit.
Teksa plani është projektuar të shtrihet deri më 2027, Shqipëria pritet të alokojë deri në fund të këtij viti 45 mln euro ne fushën e investimeve ose vetëm 4% e totalit të planit të mbështetjes financiare nëse gjithçka shkon sipas parashikimeve të qeverisë tonë.
Vlera e përgjithshme që pritet të përfitojë, në parim, vendi ynë, për periudhën 2024–2027, në total arrin 922,085,888 euro (grant dhe kredi), pagesa të kushtëzuara me zbatimin e reformave kyçe siç janë përcaktuar në Agjendën Kombëtare të Reformave.
Në shtator 2024, u miratua nga Komisioni Europian Agjenda e Reformave dhe programit shumëvjeçar të punës në kuadër të Planit të Rritjes për Ballkanin Perëndimor”
Vendimi zbatues i Komisionit udhëzon dhe përcakton edhe modalitetet për zbatimin e reforma që ndihmojnë në rritjen ekonomike. Por sipas qeverisë shqiptare, disbursimi i mbështetjes së Bashkimit Europian do të kushtëzohet nga progresi i matshëm në zbatimin e reformave të parashikuar në Agjendë.
Kushtet e pagesës do të përcaktohen në bazë të plotësimit të hapave cilësorë dhe sasiorë, sipas afateve kohore të përcaktuara për secilën reformë, të cilat kanë si qëllim stimulimin e rritjes dhe vendosjen e përfituesve në një rrugë të qëndrueshme konvergjence, për t’i orientuar ata drejt reformave specifike që lidhen me bazat e zgjerimit, proces ky që përfshin ndër të tjera edhe sundimin e ligjit, luftën kundër korrupsionit dhe krimit të organizuar.
Në përputhje me nenin 19 të Rregullores (BE) 2024/1449, për të maksimizuar ndikimin e mbështetjes financiare të Bashkimit për të tërhequr investime shtesë dhe për të siguruar kontrollin e Bashkimit Europian mbi shpenzimet, investimet në infrastrukturë që mbështesin Agjendat e Reformave, duhet të zbatohen përmes Kornizës së investimeve të Ballkanit Perëndimor (‘WBIF’).
Nga totali i financimeve 922 milionë euro, gati një e treta e fondeve mbi 267 milionë euro shkojnë për reformën në drejtësi, Gjatë viteve të fundit, sistemi i drejtësisë ka qenë në qendër të reformave më të thella e njëkohësisht më të rëndësishme në funksion të përmbushjes së standardeve europiane.
Për përmirësimin e klimës së biznesit do të jepen 209 milionë euro, kapitalin njerëzor 189 milionë euro, aftësitë digjitale 127 milionë euro dhe energjia dhe tranzicioni i gjelbër 127,8 milionë euro.
Postimi ” Fondi 922 mln euro i BE me pikatore, vetëm 45 mln euro investime priten këtë vit ” eshte marre nga Revista Monitor.
