Fondi i pensioneve i Suedisë Alecta ka shitur pjesën më të madhe të zotërimeve të tij në bono të thesarit të SHBA-së gjatë vitit të kaluar, për shkak të rritjes së rrezikut dhe paparashikueshmërisë së politikës amerikane, tha drejtori i investimeve i fondit.
“Që nga fillimi i vitit 2025, ne i kemi ulur zotërimet tona në obligacione të qeverisë amerikane në disa raunde dhe, së bashku, këto reduktime përbëjnë shumicën e zotërimeve tona,” tha drejtori i investimeve të Alectas, Pablo Bernengo, në një deklaratë për Reuters.
“Mbi këtë, ne kemi vazhduar të mbajmë një raport të lartë mbrojtjeje valutore kundër dollarit amerikan,” tha ai.
Bernengo, megjithatë, nuk pranoi të komentojë për sasinë e saktë të aseteve të shitura.
E përditshmja suedeze e biznesit Dagens Industri raportoi, pa identifikuar burimet e saj, se Alecta kishte shitur bono të thesarit amerikan në vlerë 70–80 miliardë korona suedeze (7.7–8.8 miliardë dollarë) gjatë vitit të kaluar, nga një portofol prej 100 miliardësh.
Në deklaratën e tij për Reuters, Bernengo nuk përmendi në mënyrë specifike shqetësimet e shtuara mbi politikën ndërkombëtare të SHBA-së që nga fillimi i këtij viti dhe kërcënimet për tarifa të tjera tregtare.
Këto zhvillime kanë ringjallur në tregje bisedat për strategjinë “Sell America”, e cila u shfaq për herë të parë vitin e kaluar, kur Presidenti i SHBA-së Donald Trump nisi vendosjen e tarifave.
Dalja nga investimet u bazua në një vlerësim të rritjes së riskut në bonot e qeverisë amerikane dhe në dollarë, “të lidhur me uljen e parashikueshmërisë së politikave të ndjekura, në kombinim me deficite të mëdha buxhetore dhe rritjen e borxhit publik,” shtoi deklarata e Bernengos.
Të martën, fondi danez i pensioneve AkademikerPension tha se do të shesë zotërimet e tij në bono të thesarit të SHBA-së, me vlerë rreth 100 milionë dollarë, deri në fund të këtij muaji, duke përmendur gjendjen e dobët të financave të qeverisë amerikane. / Reuters
Postimi ” Fondi suedez i pensioneve ul bonot e thesarit amerikan për shkak të pasigurisë politike ” eshte marre nga Revista Monitor.
