Mbiçmimi rekord i lekut ndaj monedhës së përbashkët europiane ka prekur edhe fitimet e Bankës së Shqipërisë. Guvernatori Gent Sejko ka raportuar se për vitin 2022 Banka e Shqipërisë rezulton me bilanc negativ financiar. Gjithsesi, ai sqaroi se sigurimi i ftimeve nuk është aspak prioritet i Bankës Qendrore dhe se fokusi është përqëndruar tërësisht te stabiliteti ekonomik e financiar i vendit.
Një pjesë e mirë e diskutimeve në Komisionin parlamentar të Ekonomisë u fokusua te inflacioni dhe ndërhyrjet e Bankës së Shqipërisë përmes rritjes së normës bazë të interesit. Sipas Sejkos, në rast se infacioni do të vijojë të qëndrojë në nivele të larta, norma bazë e interesit mund të rritet edhe dy herë gjatë këtij viti.
Sejko përsëriti qëndrimin e Bankës së Shqipërisë lidhur me mbiçmimin e leku duke e quajtur zhvillim të natyrshëm për shkak të prurjeve të larta të euros në ekonomi prej investimeve të huaja, eksporteve e remitancave.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
