Inflacioni bazë iu kthye rënies në muajin shtator, pas dy muajve radhazi në rritje të lehtë.
Sipas informacionit Bankës së Shqipërisë, inflacioni bazë zbriti në 2.32%, nga 2.37% që kishte qenë në muajin gusht. Edhe me bazë vjetore inflacioni bazë ngelet në rënie të ndjeshme. Në të njëjtën periudhë të vitit të kaluar inflacioni bazë shënonte nivelin 3.77%.
Për të gjithë tremujorin e tretë, inflacioni bazë u shfaq i qëndrueshëm në nivelin 2.33%, ndërsa në tremujorin e dytë kishte shënuar nivelin 2.32%. Të dhënat e tremujorit të tretë tregojnë se presionet inflacioniste të sezonit turistik, të lidhura sidomos me rritjen e kostove të punës, kanë qenë të kontrolluara.
Inflacioni bazë llogaritet nga Banka e Shqipërisë për një grup mallrash dhe shërbimesh që zënë 69% të peshës në shportën e përgjithshme të Indeksit të Çmimeve të Konsumit. Inflacioni bazë përjashton ato produkte që zakonisht kanë luhatshmëri të lartë, kryesisht produktet ushqimore dhe ato energjetike. Qëllimi i llogaritjes së inflacionit bazë është ta zhveshë rritjen e përgjithshme të çmimeve nga luhatjet me natyrë më afatshkurtër. Në veçanti, inflacioni bazë tenton të vlerësojë presionet e brendshme inflacioniste mbi inflacionit, që në vitet e fundit kanë ndikuar shumë prej rritjes së kostos së punës të bizneseve.
Edhe inflacioni total në ekonomi ka vijuar tendencën rënëse. Sipas INSTAT, për shtatorin inflacioni zbriti në 1.9%, duke prekur nivelin më të ulët në më shumë se tre vjet.
Banka e Shqipërisë vlerëson se rënia e inflacionit gjatë vitit 2024 ka pasqyruar, në masën më të madhe, reduktimin e shpejtë të inflacionit të importuar. Kjo ecuri është ndikuar si nga rënia e inflacionit në partnerët tanë tregtarë, ashtu edhe nga kursi i fortë i këmbimit.
Edhe inflacioni i gjeneruar nga zhvillimet e brendshme ekonomike dhe monetare ka ardhur në rënie, por, sipas Bankës së Shqipërisë, kjo rënie është më e ngadaltë dhe presionet e brendshme inflacioniste mbeten ende në nivele që nuk janë konsistente me objektivin e stabilitetit të çmimeve.
Nivelet e ulëta të inflacionit këtë vit kanë sjellë edhe ndryshimin e kahut të politikës monetare të Bankës së Shqipërisë. Në muajin korrik, Këshilli Mbikëqyrës vendosi uljen e normës bazë të interesit nga 3.25% në 3%. Kjo ulje i dha fund ciklit shtrëngues të politikës monetare, që nisi në mars të vitit 2022, në përgjigje ndaj valës inflacioniste.
Për momentin, Banka e Shqipërisë ka preferuar të qëndrojë në nivelin 3% dhe të mos vijojë me ulje të mëtejshme, pavarësisht se inflacioni total dhe komponenti i tij bazë janë poshtë objektivit. Banka e Shqipërisë pret një rritje të inflacionit drejt objektivit duke filluar nga viti i ardhshëm.
Postimi ” Inflacioni bazë ra lehtë në muajin shtator ” eshte marre nga Revista Monitor.