Niveli shumë i lartë i inflacionit ka detyruar Ministrinë e Financave të ndërhyjë në ligjin aktual të akcizave. Ky ligj indekson çdo dy vjet disa tarifa të akcizave me normën zyrtare të inflacionit të shpallur nga INSTAT-i për dy vitet paraardhëse, me qëllim reflektimin e rritjes së indeksit të çmimeve të konsumit të mallrave mbi nivelin e akcizës së aplikuar, si dhe parandalimin e erozionit në akciza. Indeksimi ligjor çdo dy vjet i tarifave të akcizës u vendos nga Ministria e Financave, bazuar në nivelin e inflacionit mesatar të rezultuar në 10 vjetët e fundit, i cili varionte në nivelin rreth 1.7 % në vit, raporton .
Sipas këtij parashikimi, nivelet e akcizës për produktet e akcizueshme do të rriteshin me mesatarisht 3-3.4 %, çdo dy vjet. Por një formulë e tillë ka dalë jashtë loje duke parë ecurinë e inflacionit dy vitet e fundit. Sipas relacionit shpjegues të Ministrisë së Financave, nëse vijohet me formulën aktuale niveli i akcizave nga janari 2024 duhet të rritet +11,5 % dhe nëse edhe në vitet në vijim inflacioni do të rezultojë në nivele mbinormale, indeksimi do ndikojë në rritjen e çmimeve të mallrave, të tilla, si karburantet, pijet alkoolike, birra, vera etj. Nga kjo skemë përjashtohen duhanet dhe cigaret, për të cilat, për periudhën 2022-2026 aplikohet rritje çdo vit, sipas një skedulimi të caktuar, të parashikuar në ligjin e akcizave.
Një situatë e tillë e ka detyruar Ministrinë e Financave të vendosë një vlerë kufi për llogaritjen e akcizave.
“Kjo rritje e inflacionit, me një normë mesatare vjetore prej 7.4 % në fund të vitit 2022 dhe 5.2% për periudhën janar-gusht 2023 bën të domosdoshëm kufizimin e rritjes së tarifave të akcizave për shkak të inflacionit dhe propozimin e këtij projektligji, me qëllim kufizimin e indeksimit të tarifave të akcizës brenda limiteve të një norme inflacioni të akumuluar dyvjeçare që nuk kalon 1.5%”, thekson në relacion Ministria e Financave.
Ndërhyrja reflektohet në Në nenin 18 të ligjit për akcizat “Mënyra e llogaritjes”, pika 3 ndryshohet, si më poshtë: Akciza e llogaritur sipas pikës 2, të këtij neni, indeksohet çdo dy vjet në masën e normës zyrtare të inflacionit të shpallur nga INSTAT-i, por jo më shumë se 1.5%, me përjashtim të duhanit dhe nënprodukteve të tij, për të cilat akciza do të aplikohet sipas kalendarit të përcaktuar në shtojcën nr.1, që i bashkëlidhet ligjit.
Efekti i parashikuar në buxhetin e shtetit pritet të jetë rreth 1.5 mld lekë në total, apo afërisht 15 milionë euro, i ndarë në: 0.5 mld të ardhura nga indeksimi me 1.5 % çdo dy vjet i akcizës; 0.8 mld nga kalendari i miratuar për akcizën e duhanit dhe nënprodukteve të tij; dhe 0.2 mld nga masat kufizuese në lidhje me përjashtimet nga akciza.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
