Investimet e huaja direkte u rritën përsëri në tremujorin e tretë të këtij viti.
Sipas të dhënave nga Banka e Shqipërisë, fluksi i investimeve të huaja direkte kishte vlerën e 449 milionë eurove, vlerë në rritje me 10.6% krahasuar me tremujorin e tretë të vitit të kaluar. Tremujori i tretë solli një rritje më të përshpejtuar të investimeve të huaja, pas rritjes modeste në gjysmën e parë të vitit.
Të dhënat progresive tregojnë se për këtë vit investimet e huaja direkte vazhdojnë të regjistrojnë nivelet më të larta historike.
Për 9-mujorin 2025, vlera e investimeve të huaja direkte arriti në 1.208 miliardë euro, shifër kjo 4.4% më e lartë krahasuar me të njëjtën periudhë të një viti më parë.
Detajimi i plotë i investimeve të huaja direkte sipas sektorëve nuk është ende i disponueshëm për tremujorin e tretë, megjithatë, të dhënat e gjysmës së parë të vitit treguan se pasuritë e paluajtshme vazhdojnë të jenë mbështetja kryesore për rritjen e investimeve të huaja direkte.
Për 6-mujorin 2025, investimet e huaja direkte në pasuri të paluajtshme arritën vlerën e 253 milionë eurove, në rritje me 40% krahasuar me 6-mujorin 2024. Ato përbënin më shumë se 33% të investimeve të huaja direkte për 6-mujorin e parë. Pesha e tyre specifike është rritur më tej nga niveli prej 24% i një viti më parë.
Tremujori i tretë solli një ndryshim të ndjeshëm nga tendenca e viteve të fundit, kur investimet e huaja direkte ishin mbështetur kryesisht nga fitimet e riinvestuara të ndërmarrjeve ekzistuese.
Por, në tremujorin e tretë të vitit rritja erdhi kryesisht nga flukset e reja të investimit.
Injektimi i kapitalit të ri u vlerësua në 228 milionë euro, me një rritje prej 31.8% krahasuar me të njëjtën periudhë të një viti më parë.
Për të gjithë 9-mujorin, flukset e reja të kapitalit nga investitorët e huaj arritën në 573 milionë euro, 12.4% më shumë krahasuar me të njëjtën periudhë të vitit 2024.
Ndërkohë, fitimi i riinvestuar për 3-mujorin e tretë pësoi rënie në 212 milionë euro, 9.4% më pak krahasuar me tremujorin e tretë 2024.
Megjithatë, për 9-mujorin ato ngelën në rritje të lehtë, me 0.6% krahasuar me një vit më parë, për një shumë totale prej 632 milionë eurosh.
Fitimet e riinvestuara përbënin 52% të totalit të investimeve të huaja direkte për 9-mujorin 2025.
Pesha e lartë e fitimeve të riinvestuara është tipike sidomos për sektorët e industrisë nxjerrëse apo të shërbimeve financiare, që kërkojnë flukse të vazhdueshme të investimeve të reja për të mbështetur rritjen e biznesit.
Postimi ” Investimet e huaja e shpejtuan rritjen në tremujorin e tretë të vitit ” eshte marre nga Revista Monitor.
